Dy persona janë arrestuar nga Policia në Laç, pasi dyshohen se merreshin me sigurimin dhe shpërndarjen e lëndëve narkotike në qytet.
Operacioni policor i koduar “Destinacioni” është zhvilluar nga Seksioni për Hetimin e Narkotikëve, në bashkëpunim me shërbimet e Komisariatit të Policisë Kurbin, në kuadër të hetimeve për goditjen e aktivitetit kriminal në fushën e narkotikëve.
Në pranga kanë rënë G. M., 28 vjeç, banues në Lushnjë, dhe S. K., 19 vjeç, banues në Tiranë.
Sipas Policisë, dy të rinjtë janë lokalizuar dhe ndaluar në lagjen nr. 6 të Laçit. Gjatë kontrollit të automjetit me të cilin ata udhëtonin, efektivët kanë gjetur dhe sekuestruar një sasi lënde narkotike kokainë, e ndarë në 80 doza, të dyshuara se ishin përgatitur për shitje.
Nga veprimet hetimore të kryera deri në këtë fazë, dyshohet se 28-vjeçari dhe 19-vjeçari siguronin lëndën narkotike dhe më pas e ndanin në doza, me qëllim shpërndarjen e saj në qytetin e Laçit.
Në cilësinë e provës materiale janë sekuestruar lënda narkotike, automjeti me të cilin udhëtonin dy të arrestuarit, si dhe katër aparate celulare.
Materialet procedurale i janë referuar Prokurorisë pranë Gjykatës së Juridiksionit të Përgjithshëm Lezhë, për vijimin e veprimeve të mëtejshme hetimore dhe procedurale.