Presidenti amerikan Donald Trump njoftoi të premten arritjen e një marrëveshjeje të re me Danimarkën dhe Groenlandën, e cila synon forcimin afatgjatë të pranisë dhe rolit të Shteteve të Bashkuara në sigurinë e territorit arktik.
Trump deklaroi se marrëveshja i jep SHBA-së “kontroll të përhershëm mbi sigurinë” e Groenlandës. Megjithatë, autoritetet daneze dhe groenlandeze sqaruan se marrëveshja nuk cenon sovranitetin e ishullit dhe nuk nënkupton kalimin e tij nën kontrollin amerikan.
Sipas raportimeve, marrëveshja parashikon zgjerimin e pranisë ushtarake amerikane dhe forcimin e bashkëpunimit për sigurinë në Arktik. Ajo synon gjithashtu të pengojë vendet kundërshtare të NATO-s që të krijojnë baza ushtarake ose të kryejnë investime në sektorë strategjikë të Groenlandës.
Marrëveshja pritet të nënshkruhet gjatë Asamblesë së Përgjithshme të Kombeve të Bashkuara dhe duhet të marrë miratimin e parlamenteve të Danimarkës dhe Groenlandës.
Ky zhvillim vjen pas deklaratave të mëparshme të Trump për marrjen e Groenlandës, të cilat kishin shkaktuar tensione me Danimarkën. Pavarësisht forcimit të rolit amerikan në sigurinë e ishullit, Groenlanda mbetet pjesë autonome e Mbretërisë së Danimarkës./Versus.al
