Dinamo City vazhdon ecurinë pozitive në Abissnet Superiore. Blutë mposhtën 3-1 Laçin në “Elbasan Arena”, në takimin e mbrëmjes së të shtunës për javën e pestë të kampionatit.
Me këtë fitore, skuadra e Ilir Dajës regjistron suksesin e katërt radhazi në kampionat dhe ngjitet në kuotën e 12 pikëve, vetëm një pikë pas Teutës që kryeson me 13. Laçi mbetet në kuotën e 7 pikëve.
Më herët gjatë ditës, Vora dhe Skënderbeu u ndanë në barazimin 1-1 në një ndeshje që prodhoi dramë deri në minutat e fundit.
Bernard Karrica kaloi Vorën në avantazh në minutën e 33-të, ndërsa vendasit mbetën me 10 lojtarë pas daljes me të kuq të Klaus Kasharit në pjesën e dytë.
Kur dukej se Vora po shkonte drejt fitores, Skënderbeu fitoi një penallti pas ndërhyrjes së VAR-it në minutat shtesë. Bismark Charles Sie realizoi nga pika e bardhë për rezultatin përfundimtar 1-1.
Pas barazimit, Vora shkon në 4 pikë, ndërsa Skënderbeu në 3.
Java e pestë mbyllet të dielën me dy ndeshjet e fundit: Tirana pret AF Elbasanin në orën 16:00, ndërsa Egnatia përballet me Partizanin në orën 18:30.
