Komuniteti shqiptar në Shtetet e Bashkuara të Amerikës po bëhet gati për të ngritur zërin në qendrën e diplomacisë botërore.
Përmes një njoftimi zyrtar, platforma “Liria ka Emër” bëri të ditur se organizatat shqiptaro-amerikane kanë thirrur një protestë përpara selisë së Kombeve të Bashkuara në New York.
Sipas agjendës së zbardhur, tubimi do të mbahet të martën e 22 shtatorit, në orën 18:00. Protesta vjen si një kundërshtim për vendimin e dhënë nga Dhomat e Specializuara në Hagë ndaj krerëve historikë të UÇK-së.
Organizatorët deklarojnë se kjo protestë synon të ndërgjegjësojë opinionin ndërkombëtar dhe udhëheqësit botërorë të cilët ndodhen në New York për punimet e Asamblesë së Përgjithshme të OKB-se mbi atë që ata e konsiderojnë si një përpjekje për të dëmtuar dhe njollosur luftën e pastër çlirimtare të popullit të Kosovës.
Platforma “Liria ka Emër” u ka bërë thirrje të gjithë bashkatdhetarëve që jetojnë në SHBA t’i bashkohen këtij tubimi masiv, për të treguar solidaritet me ish-krerët e UÇK-së të cilët më 16 shtator u dënuan me një total prej 81 vitesh burg për krime lufte, Hashim Thaçi e Jakup Krasniqi me 25 vite burg, Kadri Veseli me 18 dhe Rexhep Selimi me 13 vite burg, vendim që pritet të Apelohet. Kundër këtij vendimi po protestohet prej 4 ditësh edhe në Prishtinë.
