Polemikat e shkaktuara nga mënyra e ekspozimit të veshjeve të Çerçiz Topullit në Muzeun e Kalasë së Gjirokastrës kanë sjellë dorëheqjen e kreut të Agjencisë së Trashëgimisë Kulturore në qytet, Florian Hysi.
Manekini i përdorur për të paraqitur veshjet e figurës historike u bë objekt kritikash të shumta në rrjetet sociale dhe në media, ndërsa mënyra e paraqitjes së tij u konsiderua nga kritikët si e papërshtatshme për një figurë të rëndësishme të historisë shqiptare. Pas reagimeve, ekspozimi u ndryshua dhe veshjet e Çerçiz Topullit u vendosën në një manekin pa fytyrë.
Pas debatit, Florian Hysi i ka paraqitur dorëheqjen kryebashkiakut të Gjirokastrës, Flamur Golemi, duke marrë përsipër përgjegjësinë për mënyrën se si ishte realizuar ekspozimi.
Në deklaratën e tij, Hysi thekson se çdo detyrë publike duhet të shoqërohet me përgjegjësi personale dhe se ajo që u konsiderua gabim tashmë është korrigjuar.
“E bëj këtë vendim me përgjegjësi dhe me bindjen se çdo detyrë publike duhet të shoqërohet me përgjegjësi personale për çdo vendim, veprim apo gabim që mund të ndodhë gjatë saj. Ajo që u konsiderua gabim u korrigjua dhe marr të gjithë përgjegjësinë përsipër”, shkruan Hysi.
Ai shpreh mirënjohjen për Bashkinë e Gjirokastrës, kryebashkiakun Flamur Golemi, kolegët dhe veçanërisht punonjësit e Agjencisë së Trashëgimisë Kulturore, duke vlerësuar punën e kryer gjatë periudhës së drejtimit të institucionit.
Hysi nënvizon se largimi nga detyra nuk përbën heqje dorë nga bindjet e tij dhe e cilëson dorëheqjen si një akt përgjegjësie dhe respekti për institucionin.
“Dorëheqja ime nuk është dorëzim nga ajo që besoj. Është një akt përgjegjësie dhe respekti për institucionin!”, shprehet ai.
Në përfundim, Hysi thotë se do të vijojë të mbështesë Gjirokastrën, trashëgiminë kulturore dhe kujtesën kombëtare, ndërsa thekson se puna e kryer do të jetë dëshmia e periudhës së tij në detyrë.
Deklarata e plotë e Florian Hysit:
“Pas një periudhe pune të përkushtuar në shërbim të trashëgimisë kulturore, muzeve dhe Gjirokastrës, kam vendosur të jap dorëheqjen time prej pozicionit që mbaj.
E bëj këtë vendim me përgjegjësi dhe me bindjen se çdo detyrë publike duhet të shoqërohet me përgjegjësi personale për çdo vendim, veprim apo gabim që mund të ndodhë gjatë saj. Ajo që u konsiderua gabim u korrigjua dhe marr të gjithë përgjegjësinë përsipër.
Largohem me mirënjohje për mbështetjen e Bashkisë Gjirokastër, për kolegët dhe veçanërisht për punonjësit e Agjencisë së Trashëgimisë Kulturore, me të cilët kemi punuar dhe realizuar shumë më tepër sesa ishte bërë prej vitesh.
Dorëheqja ime nuk është dorëzim nga ajo që besoj. Është një akt përgjegjësie dhe respekti për institucionin!
Mbetem mirënjohës për punën e bërë, për përpjekjet tona dhe për çdo gjurmë që kemi lënë në muze dhe në kujtesën e Gjirokastrës.
Do të vazhdoj ta dua dhe ta mbështes Gjirokastrën, trashëgiminë e saj dhe kujtesën tonë kombëtare, në çdo formë që do të më jepet mundësia.
Ne u përpoqëm, atë që u konsiderua gabim e korrigjuam dhe punën do ta lëmë të flasë vetë.
Mirënjohje!
Florian Hysi”