Arabia Saudite konfirmon se Huthët u përpoqën të kryenin një sulm me raketa në Riad

Arabia Saudite konfirmoi sot se grupi rebel Huthi i Jemenit u përpoq të niste një sulm me raketa balistike në kryeqytetin Riad.

Koalicioni saudit që lufton kundër Huthëve njoftoi se raketa u kap, raporton AP. 

Koalicioni deklaroi gjithashtu se Huthitët u përpoqën të sulmonin infrastrukturën civile në portin e Yanbusë në Detin e Kuq, si dhe në qytetet Taif, Beish dhe Farasan, por këto sulme u parandaluan.

Huthët njoftuan më parë se sot kryen sulme me raketa dhe dronë ndaj objektivave “të ndjeshëm” në Riad.

Ata nuk specifikuan se cilat objektiva sulmuan në Riad, por thanë se goditën gjithashtu një strukturë të kompanisë saudite të naftës Aramco në qytetin Yanbu të Detit të Kuq, një nga qendrat kryesore për eksportet e naftës së Arabisë Saudite. 

Huthitët njoftuan se sulmi u krye në përgjigje të një sulmi ndaj kryeqytetit të Jemenit, Sana’a.

Të enjten, u regjistrua viktima e parë civile e konfliktit, kur, sipas mbrojtjes civile saudite, një banor jemenas që jetonte në Arabinë Saudite u vra nga mbetjet e një droni të ndërprerë të rebelëve Huthi.

Arabia Saudite njoftoi të mërkurën se Huthitët u përpoqën të kryenin një sulm me dron në Mekë, qytetin më të shenjtë të Islamit, të cilin sauditët thanë se u interceptua. 

Huthitët i mohuan me forcë pretendimet.

Zyrtarët rajonalë i thanë AP-së se Arabisë Saudite po i mbarojnë raketat e mbrojtjes ajrore dhe i ka kërkuar Francës, Britanisë, Pakistanit dhe Egjiptit të ndihmojnë në forcimin e mbrojtjes së saj ajrore.