Një 39-vjeçare është arrestuar në Tiranë, pasi dyshohet se punësohej përkohësisht në biznese të ndryshme me qëllim për të vjedhur xhirot ditore dhe më pas largohej.
Policia e Tiranës bëri të ditur se operacioni, i koduar “Skema”, u finalizua nga strukturat e Komisariatit të Policisë Nr. 1 dhe Nr. 2, në bashkëpunim me Forcën e Posaçme “Shqiponja”.
Në pranga u vu shtetasja Kumrie Zika, 39 vjeçe, banuese në Tiranë, e cila ishte shpallur në kërkim. Sipas hetimeve, ajo punësohej përkohësisht në subjekte të ndryshme, ku dyshohet se merrte xhiron ditore përpara se të largohej.
Gjatë operacionit janë dokumentuar 5 raste vjedhjesh të ndodhura në territorin e Komisariateve të Policisë Nr. 1 dhe Nr. 2.
39-vjeçarja u kap nga shërbimet e Forcës së Posaçme “Shqiponja” në ambientet e një lokali në Tiranë.
