Vrasja e 44-vjeçarit Artan Myrtaj në Sarandë rikthen në vëmendje një zinxhir ngjarjesh kriminale që nisi pas një plagosjeje të dyfishtë në korrik të vitit 2025 dhe që më pas u shoqërua me episode të tjera të rënda, përfshirë një vrasje me tritol.
Myrtaj, i njohur edhe me nofkën “Tani Ruzhdiut”, u qëllua për vdekje me armë zjarri paraditen e së dielës, pranë zonës së ish-agjencisë në Sarandë. Sipas të dhënave paraprake, dy persona të maskuar, që lëviznin me motor dhe mbanin skafandra, iu afruan dhe hapën zjarr ndaj 44-vjeçarit. Ai mbeti i vrarë në vend, ndërsa nga të shtënat u plagos edhe një kalimtar i rastit.
Hetuesit po punojnë për identifikimin dhe kapjen e autorëve, ndërsa ende nuk është konfirmuar zyrtarisht nëse atentati i sotëm lidhet drejtpërdrejt me konfliktet e mëparshme në Sarandë.
Plagosja e dyfishtë e korrikut 2025
Pikënisja e kësaj historie kriminale daton më 17 korrik 2025, kur në Sarandë u plagosën me armë zjarri Gëzim Hajdaraj dhe Ernest Lama, të dy banues në Kamëz.
Sipas hetimeve të asaj kohe, ngjarja kishte ardhur pas një konflikti të lidhur me një pronë. Policia identifikoi Ramadan Zoton si personin e dyshuar për të shtënat, ndërsa Artan Myrtaj, Klaus Jaçaj dhe Erjon Canaj u shpallën në kërkim për “përkrahje të autorit të krimit”.
Artan Myrtaj u arrestua më 20 korrik 2025, pas ekzekutimit të urdhrit të ndalimit të lëshuar nga Prokuroria. Në atë kohë, policia deklaroi se ai dyshohej për veprën penale “Përkrahja e autorit të krimit”.
Sipas të dhënave të raportuara për dosjen, Myrtaj, Jaçaj dhe Canaj dyshohej se kishin ndihmuar Zoton gjatë dhe pas ngjarjes, përfshirë largimin e tij nga vendi i plagosjes.
Nga plagosja te hakmarrjet
Pas plagosjes së dyfishtë, në Sarandë u regjistruan edhe episode të tjera kriminale që u lidhën në raportimet mediatike me këtë konflikt.
Një prej tyre ishte vrasja me tritol e Isuf Jaçajt, babait të Klaus Jaçajt. Po ashtu, u raportua edhe për një rast të shkatërrimit të pronës së Ramadan Zotos.
Këto episode kanë krijuar një kronologji të përplasjesh dhe hakmarrjesh mes personave të lidhur me ngjarjen e korrikut 2025. Megjithatë, lidhja konkrete mes tyre dhe atentatit të sotëm mbetet për t’u provuar nga hetimi.
Kush është Artan Myrtaj?
Artan Myrtaj ishte arrestuar në vitin 2025 për akuzën e “Përkrahjes së autorit të krimit”, në lidhje me plagosjen e dyfishtë në Sarandë. Ai dhe Klaus Jaçaj, të proceduar për të njëjtën vepër penale, ishin liruar para pak kohësh, ndërsa Erjon Canaj vijon të jetë në kërkim, sipas raportimeve të publikuara sot. Ramadan Zoto ndodhet në burg për çështjen e plagosjes së Gëzim Hajdarajt dhe Ernest Lamajt.
Tashmë hetuesit po përpiqen të zbardhin autorësinë dhe motivin e vrasjes së Artan Myrtajt, ndërsa një nga pistat që po shqyrtohet është edhe historia e konflikteve të mëparshme. Për momentin, kjo mbetet pjesë e hetimit dhe nuk ka një konfirmim zyrtar për motivin e atentatit.