"Nuk do të largohem"/ Merz flet pas humbjes së thellë të CDU-së në zgjedhjet e dy landeve gjermane

Kancelari gjerman Friedrich Merz është zotuar se do të qëndrojë në detyrë, pavarësisht rezultateve të dobëta të parashikuara nga sondazhet për partinë e tij, CDU, në zgjedhjet në dy lande në Gjermani.

Në landin e Mecklenburg-Pomerania, Alternativa për Gjermaninë (AfD) pritej të merrte rreth 38% të votave, duke dalë forcë e parë, ndërsa socialdemokratët e SPD-së renditeshin të dytët me rreth 36%. CDU-ja rrezikonte të merrte një rezultat shumë të dobët dhe të kalonte vetëm me vështirësi pragun për të hyrë në parlamentin e landit.

Në Berlin, ndërkohë, CDU-ja, e cila qeveris kryeqytetin, pritej të merrte rreth 20% të votave, pas Partisë së Majtë, e cila ishte në rreth 26%. Merz e cilësoi rezultatin në Mecklenburg-Pomerania si “një katastrofë” për CDU-në, po hodhi poshtë çdo ide për largimin e tij nga posti i kancelarit.

“Reformat duhet të vijnë”, deklaroi ai, duke iu referuar planeve të koalicionit qeverisës për ekonominë, taksat dhe sistemin e mirëqenies sociale.

Sipas Merz, këto reforma janë të nevojshme për ta çuar vendin përpara dhe për t’iu kundërvënë rritjes së ndikimit të autoritarizmit në shoqërinë gjermane. Rezultatet e zgjedhjeve shtojnë presionin ndaj kancelarit, i cili është përballur me rënie të mbështetjes dhe me spekulime se mund të zëvendësohet gjatë mandatit. Vetëm pak ditë më parë, drejtuesit e tetë landeve gjermane kishin shprehur publikisht mbështetjen për të.

Merz, i cili ka vetëm rreth 16 muaj në post, ka mbrojtur politikat e qeverisë duke argumentuar se një pjesë e problemeve të Gjermanisë janë trashëguar nga qeveritë e mëparshme. Ndërkohë, përpjekja e CDU-së për të ashpërsuar qëndrimin ndaj çështjeve si emigracioni nuk ka dobësuar mbështetjen për AfD-në, ndërsa ka shkaktuar pakënaqësi edhe tek votuesit më të majtë.

Megjithatë, rezultatet e zgjedhjeve lokale nuk nënkuptojnë automatikisht ndryshim të qeverisë federale. Në Mecklenburg-Pomerania, edhe nëse AfD-ja del forcë e parë, partitë e tjera kanë përjashtuar bashkëpunimin me të, duke e bërë të pasigurt përfshirjen e saj në qeverisjen e landit. Rezultatet e para ishin ende projeksione dhe jo rezultatet përfundimtare. /CNA