Piloti i Ferrarit reagoi në rrjetet sociale për të mohuar lajmet sipas të cilave ai kishte kërkuar ndryshime në personelin e skuadrës. “Nuk kam kërkuar kurrë që dikush nga ekipi im të zëvendësohej”, deklaroi në mënyrë të drejtpërdrejtë piloti britanik, duke iu kundërpërgjigjur zërave që ditët e fundit kishin qarkulluar lidhur me pretendimet se shtatë herë kampioni i botës dëshironte një riorganizim të stafit të Ferrarit.
Sipas këtyre zërave, Hamilton kishte bërë presion për ndryshime në strukturën e ekipit të Ferrarit në pistë, duke kërkuar zëvendësimin e disa prej anëtarëve të tij. Megjithatë, shtatë herë kampioni i botës vendosi të reagojë personalisht përmes kanaleve të tij në rrjetet sociale. “Kam parë disa lajme që kanë qarkulluar dhe dua të sqaroj situatën. Nuk kam kërkuar kurrë që dikush nga ekipi im të zëvendësohej.
Të gjithë njerëzit me të cilët punoj angazhohen fort çdo ditë dhe përkushtimi i tyre është ajo që na mundëson të ecim përpara”, shkroi Hamilton në “Instagram”. Duhet theksuar se, gjatë javëve të fundit, britaniku kishte shprehur kritika të forta ndaj mënyrës së drejtimit të skuadrës nga Fred Vasër, veçanërisht pas duelit me Sharl Lëklerkun në kthesën e dytë në Monza.
Hamilton kishte theksuar gjithashtu se priste që urdhrat e skuadrës të ishin vendosur shumë më herët. Zërat e rinj lidhen me pretendime për përplasje të brendshme, veçanërisht sa i përket marrëdhënies mes Hamiltonit dhe disa anëtarëve të ekipit të garave që punojnë gjatë fundjavave të Çmimit të Madh. Por piloti 41-vjeçar iu përgjigj prerazi këtyre pretendimeve:
“Gjithmonë përpiqem t’u jap forcë njerëzve dhe t’i ndihmoj të jenë versioni më i mirë i vetvetes. Ose, të paktën, t’i ndihmoj të shohin më të mirën që kanë brenda tyre. Ndoshta nuk ia dal gjithmonë, por ky është qëllimi im dhe kjo është arsyeja përse jam këtu. Ne të gjithë punojmë së bashku dhe do të vazhdojmë ta bëjmë këtë”, përfundoi Luis Hamilton në pjesën e dytë të mesazhit të tij.