Pas katër vitesh lufte, zgjedhjet parlamentare në Rusi, partia e Putinit kryeson bindshëm
Partia në pushtet “Rusia e Bashkuar”, e lidhur me presidentin Vladimir Putin, po shkon drejt fitores në zgjedhjet parlamentare në Rusi. Komisioni Qendror i Zgjedhjeve njoftoi se, pas numërimit të rreth 14% të votave, partia ka marrë 57.5% të votave. Ndërkohë, një exit poll i institutit shtetëror VCIOM e nxjerr “Rusinë e Bashkuar” me 49.4%.
Votimi u zhvillua për tre ditë dhe është procesi i parë zgjedhor për Dumën ruse që nga nisja e pushtimit në shkallë të gjerë të Ukrainës në vitin 2022. Zgjedhjet u zhvilluan edhe në territore ukrainase të pushtuara dhe të aneksuara nga Rusia, proces që Ukraina dhe një sërë vendesh e kundërshtojnë.
Presidenti Putin e kishte cilësuar këtë proces zgjedhor si një test të mbështetjes për luftën në Ukrainë. Rezultati paraprak vjen në një klimë të fortë politike, ku autoritetet ruse kanë goditur ashpër zërat kundërshtues dhe opozitën, ndërsa partia Yabloko, e cila ka mbajtur një qëndrim të hapur kundër luftës, u përjashtua nga gara.
Sipas rezultateve të para, pas “Rusisë së Bashkuar” renditen Partia Komuniste me rreth 13.7% të votave, LDPR me 9.3%, Njerëzit e Rinj me rreth 8% dhe Rusia e Drejtë me rreth 5.2%. Numërimi i votave vijon dhe rezultatet përfundimtare pritet të dalin pas përfundimit të procesit.
