Sulmi në shkollën kanadeze, ngrihet padi kundër OpenAI: Autori i krimit kishte pyetur ChatGPT-në për masakrën
Provinca kanadeze e British Columbia ka ngritur padi në Kaliforni kundër OpenAI dhe drejtorit ekzekutiv të kompanisë, Sam Altman, duke pretenduar se një sulm me armë në një shkollë mund të ishte parandaluar nëse autoritetet do të ishin njoftuar për përdorimin e ChatGPT nga autorja e sulmit.
Padia lidhet me sulmin e 10 shkurtit në Tumbler Ridge, ku u vranë nëntë persona, shumica prej tyre fëmijë. Sipas dokumentit të padisë, autorja 18-vjeçare Jesse Van Rootselaar kishte qëlluar fillimisht nënën dhe vëllain e saj në banesë, përpara se të shkonte në ish-shkollën e saj, ku vrau një punonjës dhe pesë nxënës 12 dhe 13 vjeç. Më pas ajo i dha fund jetës.
Sipas pretendimeve të British Columbia, bisedat e Van Rootselaar me ChatGPT ishin sinjalizuar nga ekipi i sigurisë së OpenAI që në qershor 2025. Në padinë thuhet se anëtarë të ekipit kishin rekomanduar njoftimin e policisë, por autoritetet nuk u informuan. Llogaria e 18-vjeçares u mbyll, ndërsa ajo arriti të krijonte një llogari tjetër dhe vazhdoi përdorimin e platformës.
Provinca kërkon dëmshpërblim për kostot e shkaktuara nga sulmi, përfshirë zëvendësimin e shkollës dhe shërbimet e shëndetit mendor. Gjithashtu, kërkon një urdhër gjykate që do të detyronte OpenAI të ndryshonte mënyrën se si trajton bisedat në ChatGPT që mund të lidhen me kërcënime apo akte dhune.
Sam Altman ka shprehur më herët keqardhje për faktin që OpenAI nuk kishte kontaktuar autoritetet dhe ka premtuar përmirësime në sistemet e sigurisë. Pretendimet e përfshira në padi do të shqyrtohen në procesin gjyqësor.
/vizionplus.tv
