Kikia: Ngjarje fatale, zyrtarët e inkriminuar kanë ngrënë kokën e shtetit

Gazetari Mentor Kikia ka reaguar lidhur me zhvillimet e ditës së sotme, që përfshinin masën e sigurisë ndaj drejtueses së SHISH-it, Vlora Hyseni dhe kontrollet ndaj ish-kreut të Policisë së Shtetit, Ilir Proda.

Përmes një postimi në rrjetet sociale, Kikia e cilëson si një situatë fatale, kur institucionet më të rëndësishme shtetërore vihen në shërbim të shtetit.

Në vijim, Kikia rendit institucionet kryesore dhe disa çështje të bujshme të lidhura me to, ndërsa thekson se raste zyrtarësh të tillë po dëmtojnë edhe besimin e qytetarëve tek institucionet.

Reagimi i plotë:

Kur shteti merr formën e një organizate kriminale!

Këtu nuk jemi tek varianti “kokat hëngshin”, sepse këta kanë ngrënë kokën e shtetit dhe tonën bashkë me shtetin.
Policë të inkriminuar e zyrtarë të korruptuar ka dhe do të ketë në çdo vend.
Por kur institucionet më të rëndësishme shtetërore vihen në shërbim të krimit, kjo është fatale.

SHISH – Kryetarja e shërbimit i shërbente një grupimi të konsideruar zyrtarisht kriminal nga SPAK, duke i ofruar informacione të rezervuara. Të paktën për këtë dyshohet se është lëshuar urdhërarresti, i cili nuk është ekzekutuar, pasi Vlora Hyseni ishte larguar ndërkohë.

Policia – Ish-Drejtori i Përgjithshëm i Policisë, Ilir Proda (i larguar, me gjasë, për këtë arsye), është nën hetim për përfshirje në çështjen “Agasi - AKSHI”. Deri tani ka vetëm sekuestrime sendesh dhe marrje në pyetje në SPAK, menjëherë pas kontrollit të banesës. Një ish-vartës dhe bashkëpunëtor shumë i ngushtë u arrestua ndërsa shërbente si shofer dhe truprojë e Ergys Agasit.

AKSHI – Institucion që menaxhon të dhënat elektronike të një shteti të tërë dhe të dhënat private të shtetasve të tij. E gjithë kupola drejtuese është nën akuzë për krijim të "organizatës kriminale".

Policia Shkencore – Hallka më e rëndësishme e zinxhirit hetimor. Laboratori i saj analizon llojet e drogave, bën analizat e AND-së të të dyshuarve për krime dhe ekspertimin e armëve. Mjafton një “po” ose “jo” e këtij laboratori për të mbështetur apo për të rrëzuar provat për një krim. Shefi i laboratorit është arrestuar për bashkëpunim ma grupet kriminale.

Pyetja e madhe, së cilës duhet t'i përgjigjet hetimi, është: PËRSE?

Përse kreu i SHISH-it i ofronte informacione Agasit? Përse Policia e Shtetit i shërbente Agasit? Çfarë roli kishte laboratori shkencor? A ka manipuluar ai prova krimi? Për llogari të kujt?

Ka edhe një pyetje, së cilës nuk i përgjigjet dot as prokuroria: Përse urdhërarresti doli kur kreu i SHISH-it nuk ishte në Shqipëri e, me gjasë, nuk do të kthehet më?

Këta nuk e kanë dëmtuar shtetin, këta e kanë shkalafitur. Kanë shkatërruar besimin e nëpunësve të ndershëm dhe besimin e qytetarëve./CNA