Fjalimi në OKB/ Trump zbulon afatin, ja kur pritet të arrijë marrëveshje paqeje me Iranin

Presidenti i Shteteve të Bashkuara, Donald Trump, tha se pret që administrata e tij të arrijë një marrëveshje paqeje me Iranin pasi në SHBA të mbahen zgjedhjet e mesmandatit në muajin nëntor.

Duke folur në Asamblenë e Përgjithshme të Kombeve të Bashkuara më 22 shtator, Trump paralajmëroi se mund ta “asgjësoj Republikën Islamike” nëse nuk arrihet një marrëveshje për t’i dhënë fund konfliktit, ndonëse tha se beson që do të arrihet një marrëveshje.

“Më duhet të marr një vendim të rëndësishëm. A do të arrihet një marrëveshje me Iranin që do t’i mundësojë atij të rindërtohet dhe të krijojë një vend shumë më të fuqishëm se kurrë më parë?”, tha Trump.

“Apo do ta asgjësoj Republikën Islamike dhe do ta bëj këtë shpejt, pa u dhënë kurrë mundësi që të vrasin dhe shkatërrojnë sërish njerëz dhe vende?”.

Në fjalimin e tij ai në Kombet e Bashkuara ai shtoi: “A do t’i çoj në ferr, pa asnjë mundësi mbijetese dhe pa shpresë për madhështi në të ardhmen apo për brezat e ardhshëm? Por, besoj se do të arrijmë një marrëveshje menjëherë pas zgjedhjeve”.

Trump shpesh ka kërcënuar me sulme të mëdha ndaj Iranit, dhe më pas i ka anuluar ato, duke pretenduar se një marrëveshje mes Uashingtonit dhe Teheranit ishte afër që të arrihej.

Deri tani, një marrëveshje e qëndrueshme e paqes nuk është arritur, teksa sulmet reciproke kanë rinisur.

Në qershor u arrit një memorandum mirëkuptimi që synonte t’u jepte të dyja palëve 60 ditë për të negociuar një marrëveshje të gjerë paqeje dhe për t’i dhënë fund luftës që nisi në fund të shkurtit me sulmet ajrore të SHBA-së dhe Izraelit kundër Iranit. Ky i fundit u kundërpërgjigj me sulme në rajon.

Por, memorandumi i qershorit kjo dështoi shpejt, pasi luftimet rifilluan kryesisht rreth Ngushticës së Hormuzit, një rrugë kyç globale për transportin e dërgesave të energjisë dhe produkteve të konsumit. /REL