Deklarata e Ramës për Vlora Hysenin/ Bushati: Gjuha e dyfishtë tregon se Rama ishte në ngërç

Gazetari dhe analisti Andi Bushati ka folur lidhur me aksionin e sotëm të SPAK dhe caktimin e masave të sigurisë ndaj Vlora Hysenit, e cila u shkarkua nga detyra si drejtoreshë e SHISH mbrëmjen e sotme.

I ftuar në Syri Tv, Bushati u shpreh se aksuh nuk e priste që do arrihej deri në këtë pikë. Ai shtoi më tej se kjo është nga herët e para që sipas tij SPAK-u vepron dhe nuk rrjedh informacion për gazetarët. Bushati e cilësoi si gjuhë të dyfishtë deklaratën e kryeministrit Edi Rama për Hysenin.

“Përflitej shumë po askush nuk e priste që të arrihej deri këtu. Pra, dihej që përflitej, diheshin lidhjet, diheshin të gjitha. Edhe Proda dihej, edhe Vlora Hyseni. Problemi është që ne akoma tani kemi shumë pak informacion. Është nga herët e para që SPAK-u vepron dhe nuk rrjedhin informacione për gazetarët e SPAK-ut e të tjera e të tjera. Pra dimë që kjo zonja ka nxjerrë sekretin shtetëror dhe ka mbrojtur këta banditët. Dhe këtu pastaj, kaq dihet si fakte, këtu jemi në rrafshin e hipotezave dhe hipotezat që ngrihen tani.

Pra, ti ngrite dy pyetje. E para a e dinte, a ishte i përfshirë Edi Rama, dhe e dyta a mund të bëhet kjo pa aleatët tanë, pa amerikanët kryesisht. E para, nga mënyra si reagoi sot Edi Rama, me vonesë, me një gjuhë të dyfishtë... domethënë, një njeri që akuzohet, minimumi akuzohet, se ka nxjerrë sekretet shtetërore dhe ka bashkëpunuar me kriminelë, mundet kryeministri i një vendi ta falënderojë? E pastaj pasi ta falënderojë për arritjet e mëdha që ka pasur në SHISH, edhe të thotë që ajo ka fajet e saj personale dhe mëkatet e asaj nuk e dëmtojnë qeverinë.

Pra çfarë tregonte kjo gjuhë e dyfishtë? Kjo gjuhë e dyfishtë tregonte që Rama ishte në ngërç. Ishte në një ngërç me atë që edhe nuk do të njësohet me bandën e Ergys Agasit, se po ta mbrojë publikisht, njësohet, por dhe nuk do ta hedhi poshtë se di që pozicioni i asaj zonjës ka ca dosje që mund t'i prishin punë. Prandaj bën deklarata të tilla që s'janë as mish as peshk. Dhe prandaj detyrohet, gënjej, që unë e mora vesh më vonë se jam në New York”, tha Bushati.

Ndër të tjera, gazetari tha se kryeministri Edi Rama ishte në dijeni në arrestimit të drejtoreshës së SHISH, Vlora Hyseni, ndaj për këtë arsye ka krijuar alibinë e tij.

“Ndërkohë, që po të hapësh intervistën e Ramës tek kolegia jonë Rudina Xhunga, ai gati ka bërë alibinë që unë s'kam pasur lidhje me Vlora Hysenin sepse thotë, të gjithë bota e di që unë raportet e SHIK-ut, e tha në SHIK unë i jap besim, i lexon vetëm shefja ime e kabinetit, unë s'di gjë. Pra, ai e ka ditur shumë mirë ç'do ndodhi më pas, por bëri të paditurin. Dhe kjo tregon, kjo tregon që Rama ka një ngërç me këtë punë.

Rama padyshim ka qenë në dijeni, ka bërë dy javë përpara alibinë. Nuk mundet, nuk mundet, jo ky shteti jonë që është shtet banditesk, po as në shtete serioze, të arrestohet shefja e shërbimit inteligjent, kryeministri detyrimisht lajmërohet. Nuk ndodh në asnjë vend. Jo më këtu që këta e kanë të gjithë shtetin të vetin. Pra, padyshim Rama e ka ditur, po këtë e provon dhe fakti që Rama dy javë, në gjashtë shtator, ka bërë alibinë, unë s'e di çfarë bënte, unë i kam dhënë besim të plotë, vetëm shefja ime e kabinetit e kontrollonte.

E dyta, dhe kjo e shton pastaj misterin, është pyetja jote e dytë. A bëhet kjo pa amerikanët? Ne mbajmë mend, kur Sali Berisha donte të shkarkonte shefin e SHIK-ut, u bë nami. U bë nami si mund ta shkarkosh ti që e kishte kompetencë të vetën, pa pyetur aleatët. Këtu nuk bëhet më fjalë për shkarkim, po këtu bëhet fjalë edhe për arrestim, dhe askush nuk foli. Pra, a kemi diçka aq të rëndë sa edhe partnerët, se SHIK-u dihet që kontrollohet nga amerikanët, e kanë lëshuar? Dhe a shkon kjo përtej Vlora Hysenit? Këto janë pyetjet që në mungesën e fakteve bazë, po me logjikë dhe duke njohur kuadrin e madh, janë pyetjet më themelore sot, mendoj unë”, tha Bushati. /CNA