Irani dhe Shtetet e Bashkuara kanë lënë të kuptohet sot se mund të rikthejnë negociatat për t’i dhënë fund konfliktit mes tyre. Presidentët e të dy vendeve pritet të marrin pjesë në Asamblenë e Përgjithshme të Kombeve të Bashkuara në Nju Jork.
Ky do të ishte takimi i parë në një ngjarje ndërkombëtare ku do të merrnin pjesë Donald Trump dhe Masoud Pezeshkian që nga nisja e asaj që Trump e ka quajtur “Operacioni Epik Tërbim” kundër Iranit në shkurt, në koordinim me Izraelin. Trump deklaroi të dielën se do të ishte i hapur për një takim me presidentin iranian.
Ndërkohë, një zyrtar i lartë iranian deklaroi se aktualisht nuk kishte plane për një takim të drejtpërdrejtë mes dy presidentëve, por se delegacioni i Iranit kishte autoritet të plotë për të ringjallur bisedimet.
Sipas zyrtarit iranian, Irani mund të rihapë Ngushticën e Hormuzit për anijet e vendeve të Gjirit brenda shtatë ditësh, nëse Shtetet e Bashkuara përmbushin kërkesat e Teheranit për të lehtësuar presionin ushtarak dhe për të hequr bllokadën amerikane ndaj porteve iraniane. Gjithashtu ai shtoi se Irani ia kishte përcjellë Uashingtonit, përmes ndërmjetësve, propozimin e tij të fundit javën e kaluar.
“SHBA-të duhet të njoftojnë se duan ta zgjidhin çështjen në mënyrë diplomatike, ta bëjnë këtë zyrtare dhe më pas të bien dakord për një afat kohor se si do të ecë përpara procesi. Asambleja e Përgjithshme e OKB-së është një mundësi e artë për SHBA-të që t’i rikthehen diplomacisë,” tha zyrtari.
Sondazh
Lexo gjithashtu
