Bashkimi Europian ka arritur një kompromis për të ndryshuar mënyrën e zgjatjes së sanksioneve individuale ndaj Rusisë, duke vendosur që masat kufizuese të vazhdojnë të jenë në fuqi për një periudhë trevjeçare.
Vendimi u dakordësua në mbledhjen e përfaqësuesve të përhershëm të vendeve anëtare, Coreper, ndërsa miratimi përfundimtar pritet të bëhet përmes procedurës së shkruar.
Sipas burimeve diplomatike europiane të cituara nga Adnkronos, pjesë e kompromisit është edhe ndryshimi i listës së personave të sanksionuar. Nga lista pritet të hiqen dy oligarkë të njohur rusë, Alisher Usmanov dhe Michail Fridman.
Negociatat mes vendeve anëtare nuk kanë qenë pa pengesa. Letonia kishte shprehur kundërshtim ndaj marrëveshjes, por në fund ka pranuar të abstenojë, duke i hapur rrugë konsensusit për vazhdimin e regjimit të sanksioneve.
Masat lidhen me veprimet që cenojnë integritetin territorial dhe sovranitetin e Ukrainës dhe aktualisht prekin rreth 3 mijë persona dhe entitete.
Deri tani, lista e sanksioneve rishikohej çdo gjashtë muaj. Ndryshimi i miratuar parashikon që regjimi të zgjasë për 36 muaj, me synimin për t’i dhënë më shumë qëndrueshmëri dhe parashikueshmëri politikës së sanksioneve të BE-së ndaj Rusisë.
Ndërkohë, sipas burimeve europiane, lista mund të zgjerohet edhe me persona dhe entitete të tjera në vijim.
