Arbër Hoxha do të vijojë aventurën te Dinamo Zagreb, pasi në momentet e fundit ka refuzuar transferimin te Al Uahda në Emiratet e Bashkuara Arabe.
Klubet kishin arritur marrëveshjen për transferimin e sulmuesit shqiptar, me operacionin që do të kapte vlerën e 2.5 milionë eurove. Megjithatë, marrëveshja nuk u finalizua për shkak se Hoxha nuk ra dakord me kushtet e ofruara nga klubi arab.
Futbollisti i Kombëtares shqiptare nuk është bindur nga propozimi financiar dhe ka zgjedhur të qëndrojë në Zagreb, pavarësisht se dy klubet kishin gjetur gjuhën e përbashkët për transferimin.
Megjithatë, situata mund të ndryshojë sërish. Merkatoja në Emiratet e Bashkuara Arabe mbetet e hapur deri më 28 shtator, ndaj Hoxha mund të marrë një tjetër ofertë që mund ta bëjë të rishqyrtojë të ardhmen e tij.
Për momentin, 27-vjeçari mbetet pjesë e Dinamo Zagrebit.
