Drejtoresha e Shërbimit Informativ të Shtetit (SHISH), Vlora Hyseni, ndaj së cilës Prokuroria e Posaçme (SPAK) ka caktuar masën e sigurisë “arrest në shtëpi”, është ndaluar në pikën kufitare të Vërmicës dhe më pas është dorëzuar te autoritetet shqiptare në Morinë.

Sipas raportimeve të mediave në Kosovë, Hyseni ka qëndruar gjatë ditës në Kosovë, ndërsa më pas është paraqitur te autoritetet shqiptare në pikën kufitare të Morinës, ku është ndaluar. Pas ndalimit, ajo është shoqëruar nën eskortë policie dhe pritet të transportohet drejt Tiranës, ku do t’i komunikohet zyrtarisht masa dhe akuzat e ngritura ndaj saj.

Në momentin kur SPAK kërkoi dhe gjykata caktoi masën e sigurisë, Hyseni nuk ndodhej në Shqipëri. Ajo ishte në Baku të Azerbajxhanit, ku merrte pjesë në një konferencë ndërkombëtare.

Më herët, kryeministri Edi Rama njoftoi se kishte vendosur ta lironte nga detyra drejtoreshën e SHISH, disa orë pasi u bë publik informacioni se SPAK kishte kërkuar pezullimin e saj nga detyra dhe vendosjen nën masën e “arrestit në shtëpi”.

Sipas hetimeve të Prokurorisë së Posaçme, Vlora Hyseni akuzohet për veprat penale “përkrahja e autorit të krimit” dhe “nxjerrja e sekreteve shtetërore”.

Masa e sigurisë ndaj saj lidhet me një hetim të SPAK për Ergys Agasin, i dyshuar për krijimin e një grupi të strukturuar kriminal me qëllim manipulimin e procedurave të tenderimit të Agjencisë Kombëtare të Shoqërisë së Informacionit (AKSHI).

Hyseni tashmë pritet të mbërrijë në Tiranë, ku do të vijojë procedura për ekzekutimin e masës së sigurisë të caktuar ndaj saj.