Rasti i Granit Xhakës lidhur me certifikatën e vaksinimit kundër COVID-19 ka marrë një tjetër zhvillim, pasi mjekja që i ka lëshuar dokumentin futbollistit ka deklaruar se ai është vaksinuar realisht.

Andrea L., mjekja që i ka lëshuar Xhakës certifikatën e diskutueshme, ka folur për mediat zvicerane “Blick”, duke këmbëngulur se vaksinimi i futbollistit ka ndodhur.

“E kam vaksinuar Xhakën siç duhet”, deklaroi ajo.

Të premten, “Blick” raportoi se ndaj Xhakës është nisur një procedurë penale. Futbollisti dyshohet se në vitin 2022 kishte siguruar një certifikatë të rreme vaksinimi kundër COVID-19. Hetimi lidhet me dyshimet për falsifikim dhe me mënyrën se si është siguruar dokumenti.

Fillimisht, rrethi i Xhakës i kishte mohuar akuzat. Zëdhënësi i tij, Andreas Bantel, deklaroi se futbollisti kishte konfirmim nga mjeku i tij se kishte marrë dozën e parë të vaksinës më 25 janar 2022 dhe të dytën më 11 nëntor të të njëjtit vit. Më vonë, Bantel e korrigjoi datën e dozës së dytë, duke thënë se ajo ishte administruar më 8 nëntor.

Megjithatë, të hënën Xhaka bëri një deklaratë tjetër, duke pranuar se kishte siguruar një certifikatë vaksinimi.

“Ndihesha thellësisht mosbesues ndaj vaksinës dhe isha i pushtuar nga frika dhe pasiguria. Në atë gjendje emocionale, mora një certifikatë vaksinimi në vend që t’i sqaroja pyetjet e mia përmes kanaleve të duhura. Sot e shoh qartë se kjo ishte rruga e gabuar. Ishte një gabim. Më vjen keq”, tha Xhaka.

Deklarata e mjekes sjell një tjetër version mbi atë që ka ndodhur.

“Blick” e takoi Andrea L. të martën në ordinancën e saj në Luzern, e cila vijon të jetë e hapur dhe të funksionojë normalisht. Mjekja tha se ditët e fundit kanë qenë të vështira dhe stresuese, por mohoi raportimet se ordinanca e saj ishte mbyllur.

“Ngjarjet e ditëve të fundit janë befasuese dhe stresuese në të njëjtën kohë. Shpresoj që gjithçka të zgjidhet së shpejti pozitivisht”, u shpreh ajo.

“Jam ende në dispozicion të pacientëve të mi. Ordinanca, natyrisht, është e hapur”, shtoi mjekja.

Andrea L. tregoi gjithashtu për mënyrën se si ishte organizuar vaksinimi gjatë pandemisë së COVID-19. Ajo kishte nisur të kryente vaksinime kundër koronavirusit në vitin 2021, në bashkëpunim me një farmacist të njohur.

Sipas versionit të saj, në fillim të vitit 2022 Xhaka e kishte kontaktuar për vaksinimin dhe certifikatën përkatëse.

“Meqë ai tashmë kishte antitrupa, vaksinimi i parë ishte menduar si një dozë përforcuese”, deklaroi mjekja.

Sipas saj, për Xhakën ishte e nevojshme vetëm një dozë vaksine dhe ajo dozë ishte administruar realisht. Më pas, ajo i kishte lëshuar futbollistit certifikatën e vaksinimit.

Deklaratat e mjekes bien ndesh me versionin e bërë publik nga vetë Xhaka, i cili tha se kishte marrë një certifikatë vaksinimi pa e kryer vaksinimin, ndërsa çështja tashmë është pjesë e një procedure penale në Zvicër.