Sali Berisha ka deklaruar se opozita nuk duhet të bojkotojë Parlamentin, pavarësisht kushteve të vështira në të cilat ndodhet.
Gjatë mbledhjes së Kryesisë së PD-së, lideri i opozitës tha se bojkoti do t’i shërbente kryeministrit Edi Rama, ndërsa theksoi se betejën politike duhet ta bëjnë brenda Kuvendit.
Ai akuzoi kryeministrin se po përballet me një situatë të rëndë politike dhe se lufton për ruajtjen e pushtetit, ndërsa theksoi se “nga karrigia e kryeministrit ai e ka vendin në qeli”.
“Në këtë kuadër vendimi më i lehtë i kësaj partie do të ishte bojkoti i Parlamentit, por unë kam qenë dhe mbeten i bindur, se ky do ishte një avantazh për Edi Ramën.
Sot i damkosur më shumë se kurrë, çdo njeri nga ne duhet ta ketë të qartë se ai lufton për ekzistencën e tij dhe e din që nga ajo karrige, për atë nuk ka vend tjetër përveçse në qeli me dhjetëra e dhjetëra vite burg për krimet monstruozë që ka kryer. Ai është i aftë për gjithçka, për të ruajtur pushtetin e tij dhe për të ruajtur karrierën e tij.
Në Parlament jemi në kushte shumë të vështira, por në këto kushte ne duhet ti japim atij po në Parlament përgjigjet më të forta”, tha Berisha.
