Përmes një njoftimi të thatë për shtyp, Prokuroria e Posaçme deklaroi të martën se përveç masave të sigurisë për drejtoreshën e Shërbimit Informativ Shtetëror, Vlora Hyseni dhe kontrollit të banesës së ish-kreut të Policisë së Shtetit, Ilir Proda, dy persona të tjerë u arrestuan për lidhjet me Ergys Agasin.
Fatjon Kalluçi, përgjegjës sektori në Institutin e Policisë Shkencore u arrestua me vendim të Gjykatës së Posaçme për veprën penale të “zbulimit të akteve ose të dhënave sekrete”, ndërsa Emro Sulejmani, një punonjës i agroturizmit “Kodra e Kuajve” u arrestua me akuzën e përkrahjes së autorit të krimit.
SPAK deklaroi se përveç masave të sigurisë ishin kryer kontrolle në një kompleks vilash që ndodhen në kryqëzimin e rrugëve “Durrësi në Shekuj” dhe “Bajram Tusha” në zonën e Shkozetit në Durrës, të cilat zotërohen nga persona të hetuar për krim të organizuar. Në këtë kompleks dyshohet se Ergys Agasi është fshehur përgjatë tetë muajve që ishte në kërkim nga SPAK.
Hetimet që po zhvillohen ndaj Hysenit, Prodës dhe dy personave të tjerë derivojnë nga një tjetër çështje e bujshme e hetuar nga SPAK, që tregon ekzistencën e një grupi të strukturuar kriminal për manipulimin e tenderave të Agjencisë Kombëtare të Shoqërisë së Informacionit, AKSHI, nën drejtimin e dyshuar të Agasit.
Ergys Agasi u ndalua më 26 gusht së bashku me Uljan Shpatarakun, një ish-drejtues i Policisë së Elbasanit.
Për më shumë se një dekadë, AKSHI menaxhoi një buxhet të stërmadh, ku vetëm në 19 procedura të hetuara nga SPAK u llogarit një fond limit prej 5.9 miliardë lekësh (rreth 59 milionë euro). Hetimi zbuloi se drejtoresha e AKSHI, Mirlinda Karçanaj dhe zëvendësja e saj, Hava Delibashi i kishin lënë këto fonde në duart e një grupi të strukturuar kriminal, duke paracaktuar fituesit dhe duke siguruar devijimin e dhjetëra milionë eurove drejt llogarive të biznesmenit të IT-së, Ermal Beqiraj dhe biznesmenit Ergys Agasi.
Ortaku i Agasit, Ermal Beqiraj u arrestua në Francë më 24 korrik, ndërsa po fluturonte me një avion të lehtë në një hapësirë ajrore të kufizuar mbi centralin bërthamor të Penly-t dhe u shoqërua nga forcat ajrore derisa u ul në aerodromin e Albertit në rajonin e Somme-s në veri të Francës.
Sipas SPAK, hetimet e mëtejshme të autoriteteve franceze identifikuan pasuritë e Beqirajt në Francë, të cilat dyshohet se kanë origjinë kriminale. Sipas Prokurorisë së Posaçme, Beqiraj dyshohet se transferoi drejt Francës një pjesë të fitimeve të paligjshme me të cilat bleu një kështjellë, dy apartamente, mjete motorike dhe mbi 2 milionë euro i depozitoi në llogari bankare.
