Zjarre në parkun e Apolonisë dhe Gjirin e Lalëzit/ Ja si paraqitet situata

Dy vatra zjarri kanë rënë që prej orëve të mbrëmjes së të martës në Pojan - Parku Arkeologjik i Apolonisë, Fier dhe në Gjirin e Lalëzit, Durrës.

Ministria e Mbrojtjes bën me dije se rreth 100 efektivë të Forcave të Armatosura janë angazhuar në operacionet për shuarjen e zjarreve në dy vatra të evidentuara mbrëmjen e djeshme.

Në Gjirin e Lalëzit pranë zonës së Shën Pjetrit, krahas 68 efektivëve të FA-së, janë angazhuar edhe 15 automjete zjarrfikëse nga bashkitë Durrës, Shijak, Tiranë, Kamëz, Vorë, Kavajë dhe Elbasan. Pas angazhimit të efektivëve gjatë gjithë natës në këtë zonë, për ndërhyrjen në terrenin e vështirë kodrinor është angazhuar edhe një helikopter, që po vijon punën nga ajri.

Në Pojan-Parku Arkeologjik i Apolonisë, efektivët e Forcave të Armatosura vijojnë punën në terren për monitorimin e situatës, e cila tashmë është nën kontroll. Fatmirësisht nga flakët nuk është dëmtuar asnjë monument./CNA