Pa telefona, pa vonesa, pa berber në hotel! Klopp me “dorë të hekurt” te Gjermania
Jurgen Klopp ka nisur të vendosë standardet e tij te Kombëtarja e Gjermanisë, ku kërkon më shumë disiplinë, përqendrim dhe unitet brenda skuadrës.
Sipas raportimeve të BILD, Klopp ka vendosur disa rregulla të reja që ndryshojnë nga mënyra e funksionimit gjatë epokës së Julian Nagelsmann.
Një prej tyre lidhet me darkat e ekipit. Futbollistët duhet të paraqiten në kohë dhe së bashku në orarin e përcaktuar, në mënyrë që vakti të shërbejë edhe si një moment për komunikim dhe forcimin e frymës së grupit. Më parë, lojtarët kishin më shumë fleksibilitet për të mbërritur në intervalin e përcaktuar.
Një tjetër rregull ka të bëjë me telefonat celularë. Sipas raportimeve, përdorimi i tyre nuk lejohet gjatë përgatitjeve para ndeshjeve, përfshirë aktivizimin fizik në palestër, trajtimet dhe masazhet.
Ideja është që lojtarët të jenë të përqendruar te ndeshja dhe të komunikojnë më shumë me njëri-tjetrin.
Edhe prerjet e flokëve në hotelin e kombëtares janë ndaluar. Lojtarët pritet të kujdesen për këtë aspekt përpara grumbullimit, duke shmangur ndërhyrjet personale gjatë qëndrimit me ekipin.
Ndërkohë, Klopp raportohet se ka vendosur të kufizojë vizitat e familjarëve gjatë turneve të mëdha. Në vend që familjet të qëndrojnë rregullisht pranë skuadrës, vizitat do të lejohen vetëm në raste të caktuara. Synimi i raportuar është që futbollistët të fokusohen te objektivi i përbashkët dhe të krijojnë një lidhje më të fortë si grup.
Këto masa vijnë në fillim të epokës së Kloppit në stolin e Gjermanisë. Trajneri 59-vjeçar ka grumbulluar 44 lojtarë në dy skuadra për katër ndeshjet e para të Nations League, një tjetër vendim i pazakontë për të menaxhuar ngarkesën dhe për të vëzhguar sa më shumë futbollistë.
Klopp kërkon të ndërtojë një Gjermani me rregulla të qarta, komunikim më të madh dhe përqendrim maksimal, ndërsa puna e tij me “Mannschaft”-in sapo ka nisur.
