Kush i beson më Shqipërisë, me këtë Kryeministër, me këta drejtues?

Nënkryetari i PD-së, Belind Këlliçi, ka bërë një reagim në rrjetet sociale lidhur me hetimet e ditëve të fundit nga SPAK-u.

Këlliçi shkruan se me kreun e SHISH në arrest, me ministrin e Mbrojtjes nën dyshime dhe përgjime, me drejtues policie nën hetim dhe me AKSHI-n grup të strukturuar kriminal, siguria kombëtare është e shpartalluar më shumë se kurrë më parë.

Ai shton se kolonat që mbajnë shtetin janë goditur rëndë dhe pa mundësi rikuperimi. Këlliçi shprehet se tashmë jo vetëm nuk përmbushen funksionet kryesore, por skandalet e inkriminimit, kanë shkaktuar një krizë të fortë besimi në shoqëri dhe më tej.

Ai thotë se dëmi është shumë i madh, si në zhvillimet e brendshme ashtu dhe në raportet me partnerët. Sipas tij, duhet zgjidhje urgjente politike që Shqipëria të kthehet në normalitet.

Postimi i plotë:

Kush i beson më Shqipërisë, me këtë Kryeministër, me këta drejtues?!

Me kreun e SHISH në arrest për përkrahje të autorit të krimit dhe nxjerrje informacioni, me Ministrin e Mbrojtjes nën dyshime serioze dhe përgjime të bëra publike për trafik armësh dhe vegël e njeriut të punëve të pisëta, Ron Yeffet, me drejtues policie nën kontroll e hetim, me AKSH-in grup të strukturuar kriminal, siguria jonë kombëtare nuk ka qënë kurrë kaq e shpartalluar!

Kolonat që mbajnë shtetin janë goditur rëndë dhe pa mundësi rikuperimi. Kemi të bëjmë me institucione të paralizuara.

Jo vetëm nuk përmbushen funksionet kryesore, por skandalet e inkriminimit kaq të madh, kanë shkaktuar një krizë të fortë besimi në shoqëri e më tej.

Cili qytetar mund t'i besojë më SHISH apo Policisë së Shtetit, apo autoriteteve, kur del se krerët e këtyre sektorëve i shërbejnë krimit?!

Cili partner, vend anëtar i NATO apo dhe më gjërë mund t'i besojë qeverisë shqiptare dhe Tiranës në këto kushte?!

Me kreun e Shërbimit Sekret të arrestuar, me Ministrin e Mbrojtjes të implikuar, me Edi Ramën që ka marrë, përzgjedhur e promovuar këta njerëz në këto detyra e që sot nuk mban asnjë përgjegjësi.

Dëmi është shumë i madh. Si në zhvillimet e brendshme ashtu dhe në raportet me partnerët.

Kjo qeverisje, ky Kryeministër nuk mund të vijojnë më. Duhet zgjidhje urgjente politike që Shqipëria të kthehet në shinat e normalitetit.

Qeveri teknike, zgjedhje të reja! /CNA