Helikopteri ushtarak rus hyn në hapësirën ajrore të Polonisë/ Ngrihen në ajër avionët luftarakë polakë

Një helikopter ushtarak rus i tipit Mi-8 hyri për një kohë të shkurtër në hapësirën ajrore të Polonisë, pasi u nis nga enklava ruse e Kaliningradit. Kështu njoftoi këtë të mërkurë, Komanda Operacionale e Forcave të Armatosura polake.

Sipas autoriteteve polake, helikopteri qëndroi në hapësirën ajrore të vendit për 42 sekonda, ndërsa depërtimi në territorin ajror polak ishte rreth 300 metra.

Incidenti shkaktoi reagim të menjëhershëm nga Forcat e Armatosura polake. Avionë luftarakë u ngritën në ajër, ndërsa forcat tokësore dhe sistemet e mbrojtjes ajrore u vunë në gatishmëri.

“Avionët luftarakë u ngritën, ndërsa forcat tokësore dhe mjetet mbetën në gatishmëri. Natyra e incidentit tregon se Rusia po teston edhe një herë gatishmërinë e mbrojtjes sonë ajrore”, deklaroi Komanda Operacionale e ushtrisë polake.

Polonia ndodhet prej kohësh në gjendje të shtuar gatishmërie për shkak të rrezikut të shkeljeve të hapësirës së saj ajrore, veçanërisht në kontekstin e luftës së Rusisë në Ukrainë. Deri tani, Ambasada e Rusisë në Varshavë nuk ka komentuar incidentin, pasi nuk iu përgjigj menjëherë kërkesës për një reagim. /CNA