Klubi i Superiores dërgon tre lojtarë te Shqipëria

Dinamo ka tre futbollistë të grumbulluar me Kombëtaren shqiptare, një rekord për klubin kryeqytetas në këtë sezon.

Naser Aliji ishte lojtari i parë i Dinamos që mori ftesën për përfaqësuesen. Pas dëmtimit të Adrion Pajazitit, në Kombëtare u bashkua edhe Klevi Qefalia.

Më vonë, pas dëmtimit të Ivan Balliut, stafi kuqezi thirri edhe Ysni Ismailin, i cili më parë ka qenë pjesë e Shqipërisë U-21. Grumbullimi i tre lojtarëve vjen pas paraqitjeve të tyre në një sezon pozitiv me Dinamon.

Ndërkohë, skuadra ka pasur tre ditë pushim pas katër fitoreve radhazi në kampionat. Ilir Daja dhe stafi i tij do të rikthejnë ekipin në stërvitje, ndërsa gjatë javës priten disa seanca pune dhe një ndeshje miqësore.

Dinamo do ta përdorë këtë periudhë për të ruajtur ritmin dhe për të përgatitur skuadrën për rikthimin në garën zyrtare.