"Nuk takohemi me Haxhiun, pa vendosur Kuvendi për ‘Specialen’”/ Letra e familjeve Thaçi, Veseli dhe Krasniqi

Djali i Jakup Krasniqit, Altin Krasniqi ka ndarë në një postim në rrjetet sociale një letër nga familjet e Hashim Thaçit, Kadri Veselit dhe Jakup Krasniqi ku bëhet thirrje për përgjegjësi insitucionale dhe unitet qytetar.

Në letër familjet e ish-krerëve të UÇK-së, kanë shprehur mirënjohjen për popullin e Kosovës për mbështetjen, solidaritetin dhe qëndrimin e vazhdueshëm ndaj procesit gjyqësor në Hagë.

Po ashtu shprehen se presin sjellje të përgjegjshme shtetërore nga deputetët e Kuvendit të Kosovës, në mbrojtje të Kushtetutës dhe ligjit, në raport me Dhomat e Specializuara

Ndërkohë sipas tyre, deri në një vendimmarrje të Kuvendit, nuk e pranojnë ftesën për takim të Kryetares së Kuvendit, Albulena Haxhiut.

Postimi i plotë:

Letër e familjeve Thaçi, Veseli dhe Krasniqi

Ne, familjet e Hashim Thaçit, Kadri Veselit dhe Jakup Krasniqit, bëjmë thirrje për përgjegjësi institucionale dhe unitet qytetar në këto momente.

Shprehim mirënjohjen tonë të thellë për popullin e Kosovës për mbështetjen, solidaritetin dhe qëndrimin e tij të vazhdueshëm ndaj procesit gjyqësor në Hagë.

Presim sjellje të përgjegjshme shtetërore nga të zgjedhurit e popullit, në mbrojtje të Kushtetutës dhe ligjit, në raport me Dhomat e Specializuara.

E vlerësojmë ftesën e Albulena Haxhiut, por, për t’iu shmangur çdo keqkuptimi të mundshëm lidhur me ndikimin dhe ndërhyrjet familjare në vendimmarrjen e institucioneve të Republikës së Kosovës, presim që të takohemi pas vendimit të Kuvendit. /CNA