Lonely Planet ka publikuar sot listën “Best in Travel 2027”, duke vendosur në qendër një Europë pak më ndryshe nga ajo e itinerareve klasike. Lista ndahet në 25 destinacione dhe 25 eksperienca në mbarë botën, ndërsa mes zgjedhjeve europiane shfaqen qytete dhe rajone që deri tani kanë qëndruar disi nën hijen e emrave më të mëdhenj të turizmit. Në listë janë Šibenik në Kroaci, León në Spanjë, Dessau në Gjermani dhe Skanör-Falsterbo në Suedi.
Në Itali, rekomandimi nuk përqendrohet vetëm te Venecia. Lonely Planet sugjeron eksplorimin e rajonit më të gjerë të Venetos, nga Verona dhe Padova deri te Dolomitet dhe Liqeni Garda. Ndërkohë, Šibenik veçohet për arkitekturën, gastronominë dhe kalendarin e festivaleve, ndërsa León në veri të Spanjës ofron arkitekturë gotike, histori mesjetare dhe Casa Botines të Antoni Gaudí-t.
Një nga destinacionet më interesante është Skanör-Falsterbo, dy qytete bregdetare në provincën Skåne të Suedisë, të njohura si “Riviera suedeze”. Në vend të modelit klasik të pushimeve mesdhetare, këtu ideja është një udhëtim më i ngadaltë, mes bregdetit dhe rezervateve natyrore. Dessau, nga ana tjetër, propozohet për trashëgiminë e tij të lidhur ngushtë me lëvizjen Bauhaus.
Lista nuk fokusohet vetëm te vendet, por edhe te mënyra e udhëtimit. Për vitin 2027 rekomandohen ecja 100 kilometra përgjatë St Cuthbert’s Way mes Skocisë dhe Anglisë, një road trip përgjatë Route Napoléon në Francë, lundrimi mes Ishujve Aeolianë në Itali dhe eksplorimi i historisë detare nën ujërat e Egjeut në Greqi.
