Futbollistët e Kombëtares së Kosovës kanë përcjellë një mesazh solidariteti për ish-drejtuesit e UÇK-së, gjatë përgatitjeve për ndeshjet e Ligës së Kombeve.
Gjatë stërvitjes në palestër dhe më pas në stadiumin “Fadil Vokrri”, lojtarët e Kosovës kanë veshur bluza me mbishkrimin “Drejtësi për çlirimtarët”.
Në bluza ishte vendosur edhe mesazhi “Jo në emrin tim”.
Federata e Futbollit të Kosovës njoftoi se Kombëtarja dhe FFK-ja iu bashkuan mesazhit të mbështetjes për ish-drejtuesit e UÇK-së.
“Dardanët përcollën një mesazh të qartë solidariteti për katërshen e UÇK-së”, thuhet në reagimin e FFK-së.
Veprimi i futbollistëve vjen në prag të ndeshjes së radhës së Kosovës në Ligën e Kombeve. Të enjten, Kosova do të përballet me Irlandën në Prishtinë, në stadiumin “Fadil Vokrri”.
Kombëtarja vijon përgatitjet për këtë sfidë, ndërsa mesazhi i përcjellë gjatë stërvitjes ka tërhequr vëmendjen edhe jashtë fushës së futbollit./Versus.al
