Hapet kasaforta e mesazheve/ Gazetari Fundo: Komunikimet e Agasit shkojnë deri te Veliaj

Gazetari Elvi Fundo ka folur mbrëmjen e sotme lidhur me skandalin e SHISH dhe komunikimet e zbuluara mes Ergys Agasit dhe Vlora Hysenit.

Në një lidhje live me emisionin “Opinion”, Fundo tha se në bisedat e zbardhura nga telefoni i Agasit ka dhe komunikime me kryebashkiakun e arrestuar të Tiranës, Erion Veliajn.

Ai u shpreh se Ergys Agasi dhe ish-drejtoresha e SHISH, Vlora Hyseni kanë çuar mesazhe për çështjen e Veliajt. Po ashtu tha se Vlora Hyseni ka ndërhyrë në emër të Agasit dhe Veliajt për zgjedhjet e Naureda Llagamit si gjyqtare në Gjykatë Kushtetuese.

“Këto janë në kuadër të fjalëve, por di se ka komunikime me Erion Veliajn, Ergys Agasi. Ergys Agasi dhe Vlora Hyseni kanë çuar mesazhe për çështjen e Erion Veliajt. Është kryetarja e SHISH e cila ka ndërhyrë në emër të Agasit dhe Veliajt për zgjedhjen e gjyqtares së Kushtetueses, Naureda Llagamit. Naureda Llagami është një ish-punonjëse e Ajola Xoxës. Nuk është vetëm Ergys Agasi që ka një lidhje me zonjën e SHISH”, tha gazetari Fundo. /CNA