Ish-drejtuesi i Shërbimit Informativ Shtetëror, Evarist Beqiri, ka ngritur pikëpyetje mbi mënyrën se si Vlora Hyseni u përzgjodh për të drejtuar SHISH-in, duke e zhvendosur vëmendjen te procesi i emërimit dhe kontrolli institucional që paraprin vendosjen e një personi në krye të strukturës së sigurisë kombëtare.
I ftuar në emisionin “Now me Erla Mëhillin” në Euronews Albania, Beqiri tha se e njeh Hysenin prej periudhës kur ajo punonte në Kosovë dhe e cilësoi ngritjen e saj në detyrë si një rast ku, sipas tij, nuk është respektuar parimi i meritokracisë.
“Problemi është se ne duhet të merremi se si katapultohen këta individë në pozicione të tilla”, u shpreh Beqiri, duke kërkuar që vëmendja të mos përqendrohet vetëm te personi që ka mbajtur detyrën, por edhe te mekanizmi përmes të cilit ajo është përzgjedhur.
Sipas tij, në SHISH ka punonjës me vite të tëra përvojë në fushën e inteligjencës dhe sigurisë, ndërsa emërimi i një drejtuesi nga jashtë këtij karrieri ngre pikëpyetje për mënyrën se si është vlerësuar profili profesional i kandidatit.
“A mundet që të promovohet duke shkelur me të dyja këmbët meritokracinë?”, deklaroi ai.
Një tjetër pikë e ngritur nga ish-drejtuesi i SHISH-it lidhet me verifikimin e së kaluarës së Hysenit përpara emërimit.
Beqiri tha se gjatë karrierës së saj në Kosovë kanë ekzistuar, sipas tij, pikëpyetje që duhet të ishin marrë në konsideratë nga institucionet shqiptare përpara se asaj t’i besohej drejtimi i SHISH-it.
“Është bërë një kontroll kësaj të shkuarës së kësaj, se kjo ka pasur pikëpyetje për të shkuarën?”, tha Beqiri, duke shtuar se institucionet përgjegjëse duhej t’ia përcillnin informacionin personave që merrnin vendimin për emërimin.
Hyseni u propozua nga kryeministri Edi Rama për drejtimin e SHISH-it në mars 2023 dhe u dekretua nga presidenti Bajram Begaj më 3 prill të po atij viti. Në atë kohë, Rama e justifikoi propozimin duke iu referuar përgatitjes, përvojës dhe reputacionit të saj në komunitetin ndërkombëtar të inteligjencës.
Duke folur për zinxhirin institucional të emërimit, Beqiri tha se përgjegjësia nuk duhet parë vetëm te personi që ka mbajtur detyrën.
Sipas tij, përgjegjësi kanë si ai që bëri propozimin, ashtu edhe ai që e dekretoi.
“Patjetër që Presidenti, që të dy kanë përgjegjësi. (…) Pavarësisht se kush ia rekomandon, ai e ka bërë propozimin se ia jep Kushtetuta, që të bëjë propozimin dhe dekretohet nga Presidenti i Republikës. Të dy kanë përgjegjësi”, u shpreh ish-drejtuesi i SHISH-it.
Komentet e Beqirit vijnë në një moment kur Vlora Hyseni është nën hetim nga SPAK dhe ndaj saj është caktuar masa “arrest në shtëpi”, në kuadër të procedimit penal nr. 20/1 të vitit 2025. Sipas SPAK, ajo hetohet për “përkrahje të autorit të krimit” dhe “zbulim të akteve ose të dhënave sekrete”.
Megjithatë, këto janë akuza në kuadër të një hetimi dhe nuk përbëjnë një vendim përfundimtar mbi fajësinë e saj.
Në këtë kontekst, deklaratat e Beqirit e zhvendosin debatin nga vetë hetimi te mënyra se si u përzgjodh dhe u verifikua një person që iu besua drejtimi i një prej institucioneve më sensitive të shtetit.
