Ministri për Evropën dhe Punët e Jashtme Ferit Hoxha mori pjesë në takimin informues të Bordit të Paqes, së bashku me Komitetin Kombëtar për Administrimin e Gazës dhe Zyrën e Përfaqësuesit të Lartë, të mbajtur në New York të Shteteve të Bashkuara të Amerikës.

Takimi u përqendrua në përpjekjet e vazhdueshme dhe të koordinuara për të adresuar një nga krizat ndërkombëtare më urgjente dhe komplekse të kohës sonë.

Hoxha nënvizoi se Shqipëria po i mbështet në mënyrë aktive këto përpjekje, përfshirë edhe përmes kontributit të saj në Forcën Ndërkombëtare të Stabilizimit (ISF), në përputhje me Rezolutën 2803 (2025) të Këshillit të Sigurimit të OKB-së dhe planin 20-pikësh të Presidentit Trump.

"Ne mbetemi të përkushtuar për të punuar ngushtë me partnerët tanë për t'i përkthyer këto angazhime në përmirësime të prekshme në jetët e njerëzve të Gazës, duke ndihmuar në krijimin e kushteve për një të ardhme më të sigurt, të qëndrueshme dhe të begatë për të gjithë", tha Hoxha.

Angazhimet shumëplanëshe ndërkombëtare synojnë t'u përgjigjen nevojave të menjëhershme humanitare, duke hedhur themelet për siguri të qëndrueshme, stabilitet, rimëkëmbje ekonomike dhe zhvillim të qëndrueshëm në Gaza.

Rendit zhvillimet sipas orarit:
Ora 12:21
Hoxha takon Kaja Kallas në Nju Jork: Të ruhet ritmi i zgjerimit të BE-së në Ballkanin Perëndimor

Ministri për Evropën dhe Punët e Jashtme, Ferit Hoxha, mori pjesë në Nju Jork në një drekë pune të organizuar nga Kaja Kallas me liderë dhe ministra të jashtëm të vendeve të Ballkanit Perëndimor. Në qendër të diskutimeve ishte perspektiva e anëtarësimit të rajonit në Bashkimin Europian, si dhe bashkëpunimi për sigurinë dhe stabilitetin.

Hoxha tha se gjatë takimit u theksua nevoja për ta kthyer perspektivën europiane të vendeve të rajonit në hapa konkretë, për të ruajtur ritmin e procesit të zgjerimit dhe për të çuar përpara reformat.

" Kënaqësi të takohem me Kaja Kallas, Zëvendëspresidente e Komisionit Evropian dhe Përfaqësuese e Lartë e BE-së për Punët e Jashtme dhe Politikën e Sigurisë, për një shkëmbim përmbajtësor mendimesh. Diskutimet tona u përqendruan në situatën dhe dinamikën aktuale në Ballkanin Perëndimor, sfidat me të cilat përballet rajoni dhe rëndësinë e koordinimit të ngushtë të vazhdueshëm në mbështetje të paqes, stabilitetit dhe sigurisë. Ne nënvizuam rëndësinë e konkretizimit të perspektivës së BE-së për të gjithë rajonin, ruajtjen e momentit të procesit të zgjerimit, avancimin e reformave dhe ankorimin e fortë të Ballkanit Perëndimor brenda familjes evropiane. Shqipëria mbetet plotësisht e përkushtuar ndaj procesit të saj të vazhdueshëm të anëtarësimit në BE dhe për të kontribuar në mënyrë konstruktive në bashkëpunimin rajonal, si dhe në një Evropë më të fortë, më të bashkuar dhe më të sigurt" shkroi Hoxha në X. 
 

U.D/Shqiptarja.com