Dy operacione në Tiranë dhe Krujë për armëmbajtje pa leje, arrestohen 2 persona

Dy persona janë arrestuar në Tiranë dhe Krujë, pasi gjatë kontrolleve në banesat e tyre u gjetën armë dhe sende të tjera të kundërligjshme. Operacionet u zhvilluan brenda 24 orëve nga strukturat e Policisë së Tiranës.

Sipas policisë, në kuadër të dy operacioneve të koduara “Qëllimi” dhe “Kontrolli”, u sekuestruan 3 armë, 17 kapsolla elektrike, municion luftarak, një shënjestër optike, 2 mjete prerëse dhe një peshore elektronike.

Në operacionin “Qëllimi”, Forca e Posaçme “Shqiponja”, në bashkëpunim me shërbimet e Komisariatit të Policisë Nr. 4, arrestoi shtetasin A. Z., 36 vjeç, me precedent penal.

Gjatë kontrollit në banesën e tij, policia thotë se gjeti dhe sekuestroi dy armë zjarri, një pistoletë dhe një armë automatike, si dhe municion luftarak, një shënjestër optike, dy mjete prerëse dhe një peshore elektronike.

Ndërkohë, në kuadër të operacionit “Kontrolli”, shërbimet e Komisariatit të Policisë Krujë arrestuan shtetasin F. L., 28 vjeç.

Gjatë kontrollit në banesën e tij, në fshatin Brret, u gjetën dhe u sekuestruan një armë gjahu, 84 fishekë dhe 17 kapsolla elektrike, të cilat, sipas policisë, posedoheshin pa leje.

Policia bën me dije se vijojnë hetimet për të dokumentuar dhe zbardhur përfshirjen e dy personave të arrestuar në veprimtari të tjera kriminale.

Materialet procedurale i janë referuar Prokurorisë për veprime të mëtejshme.