Bashkëpunëtorët e Ergys Agasit kur ishte në kërkim/ Sot dalin në GJKKO Vlora Hyseni, Kalluçi dhe Sulejmani

Vlora  Hyseni, Ish drejtoresha e Shërbimit Informativ të Shtetit do të paraqitet sot para GJKKO-s për vlerësimin e masës së sigurisë. Në GJKKO dalin dhe menaxheri i “Kodrës së Kuajve”, Emro Sulejmani dhe Fatjon Kalluçi, shefi i Laboratorit Shkencor të Policisë së Shtetit të arrestuar më 22 shtator si bashkëpunëtorë të Ergys Agasit.

Seanca është parashikuar të nisë në orën 10:00 ndërkohë në GJKKO kanë mbërritur avokatët e tyre.

Ndërsa në orën 12:00 pritet që Hyseni të paraqitet në gjykatë e shoqëruar me polici.

Treshja akuzohet për perkrahjen e Ergysit Agasit, në kohën kur ai ishte në kërkim.

Roli i shefit të policisë dhe kryekamarierit

Mësohet se Fatjon Kalluçi me detyrë shef i policisë shkencore, i ka dërguar Agasit në muajin gusht, para se të arrestohej 3 foto të ekspertizës së makinës Land Rover Deffender me targë GG444AA të gjetur në Equos Resort.

Ndërsa kryekamarieri i dërgonte ushqime në banesë ku qëndronte i fshehur. Të dhënat janë zbuluar në telefonin e Agasit. Mësohet se Avokatët do  të kërkojnë në gjykatë shpalljen e moskopetencës dhe kohë për tu njohur me aktet.

Si u arrestua shefja e SHISH

Më 21 shtator GJKKO firmosi  masën e sigurisë ‘arrest shtëpie’ dhe pezullim nga detyra ndaj Vlora Hysenit, masë e cila u ekzekutua një ditë më pas. Po më 22 shtator kryeministri Rama dhe presidenti Bajram Begaj firmosën shkarkimin e saj.

Sipas të dhënave të hetimit, ish-kryeagjentja e SHISH ndodhej në Baku të Azerbajxhanit në momentin kur SPAK i trokiti në banesë për t’i komunikuar vendimin e gjykatës dhe akuzat për përkrahje të autorit të krimit dhe nxjerrje të sekretit hetimor, në favor të biznesmenit Ergys Agasi, i shpallur në kërkim për dosjen e AKSHI-t.

Hyseni mbërriti të martën pasdite (22 shtator) në aeroportin e Prishtinës, ku qëndroi për disa orë dhe u takua edhe me familjarë.

 Më pas, e shoqëruar nga autoritetet, u dërgua në pikën kufitare të Vërnicës dhe iu dorëzua autoriteteve shqiptare.  Fillimisht u shoqërua në Polici dhe më pas në banesë, ku do të qëndrojë deri në vendimin e ri të gjykatës.