Partia Demokratike kërkoi ndryshimin e rendit të ditës së seancës plenare, duke kërkuar që në fokus të jetë situata e krijuar në Shërbimin Informativ Shtetëror pas masave të sigurisë ndaj drejtores së SHISH, Vlora Hyseni.
Kërkesa është hedhur poshtë me votat e mazhorancës.
Rezultati i votimit shkaktoi irritimin e demokratëve të cilët bllokuan foltoren dhe u ranë tavolinave.
Pas kakofonisë së krijuar, kreu i Kuvendit Niko Pelshi ka ndërprerë seancën.
“10 minuta pushim” ka deklaruar ai.
PD kërkoi heqjen nga rendi i ditës të dy interpelancave urgjente me ministrin e Mjedisit, Sofjan Jaupaj, dhe ministren e Arsimit, Mirela Kumbaro.
Në vend të tyre, PD kërkon të shtohet një pikë me titull: “Kontroll dhe debat parlamentar me Kryeministrin Edi Rama lidhur me situatën e rëndë në Shërbimin Informativ Shtetëror.”
Në kërkesën e tij, kreu i grupit Gazment Bardhi shprehet se Kuvendi duhet t’i kërkojë Kryeministrit Edi Rama shpjegime mbi përzgjedhjen e Vlora Hysenit në krye të SHISH, si dhe mbi veprimtarinë e saj gjatë drejtimit të institucionit.
