Udinese ka bërë një goditje sensacionale mes lojtarëve të lirë: David Alaba. Mbrojtësi, i cili mbeti pa skuadër pas eksperiencës te Real Madrid, do të nisë aventurën e tij të re në Serie A. Runjaic e ka kërkuar me shumë forcë dhe, pas vizitave mjekësore që tashmë janë kryer, nesër pritet vetëm të bëhet zyrtarizimi. Një futbollist që sigurisht nuk ka nevojë për prezantim dhe që në moshën 34-vjeçare ka ende dëshirë të surprizojë. Në palmaresin e tij janë 4 Champions League, dhjetëra kampionate të fituara me Bayern Munich, por edhe me Real Madrid, përveç trofeve të kupave kombëtare.
I shpallur disa herë futbollisti austriak i vitit, Alaba i afrohet kësaj aventure me të njëjtin entuziazëm që e ka karakterizuar gjatë sezoneve të fundit, edhe atyre më të pafat, si të fundit, në të cilat dëmtimet e kanë ndalur shumë shpesh. Më 23 majin e kaluar, kundër Athletic Bilbao, ai luajti ndeshjen e tij të fundit me “Los Blancos” dhe vendosi ta përshëndeste publikun në fushë me një karrige të bardhë. Një objekt që edhe Udinese e përdori, duke publikuar në rrjetet sociale pikërisht imazhin e një karrigeje si sinjal për transferimin tashmë të afërt të austriakut Alaba.
? @David_Alaba#CAMPEON35 pic.twitter.com/vdodFA9pME
— Real Madrid C.F. (@realmadrid) April 30, 2022
Por pse pikërisht karrigia?
Në Spanjë ajo është bërë e famshme si “Silla de Alaba”, pas një arritjeje të Real Madrid në Champions League. Gjithçka nisi pas Real Madrid-PSG, në fazën e 1/8-ve të Champions League 2021/2022. Pas fitores 3-1 që solli një tjetër përmbysje të jashtëzakonshme (PSG kishte fituar 1-0 në ndeshjen e parë), Alaba festoi kualifikimin pikërisht duke ngritur një karrige drejt qiellit. As vetë ai nuk e dinte arsyen e saktë: “Ishte gjesti impulsiv më spontan dhe më i ndjerë i atij momenti”, shpjegoi pas ndeshjes. Alaba më pas ngriti sërish drejt qiellit një karrige të bardhë në prill 2022, me rastin e festimeve për fitimin e titullit të 35-të kampion të Spanjës nga Real Madrid.
Mbaroi? As që bëhej fjalë. Në maj 2024, Real Madrid luajti një gjysmëfinale të dytë të çmendur kundër Bayern Munich, duke fituar me përmbysje. Dy gola të Joselu përmbysën golin e Davies dhe i siguruan “Los Blancos” finalen e 18 të Champions League në historinë e tyre. Epo, në fund të asaj ndeshjeje, të përfshirë nga euforia, lojtarët nisën një xhiro të gjatë rreth fushës, e cila përfundoi me kapjen e një karrigeje të bardhë, me shumë gjasë të përdorur nga një punonjës i sigurisë. Në atë moment, një shok skuadre e dorëzoi menjëherë te Alaba, i cili e ngriti menjëherë drejt qiellit.
Karrigia ishte një mënyrë sarkastike për të tallur vetë austriakun Alaba, i cili kishte mbetur “ulur” në infermieri për pjesën më të madhe të sezonit për shkak të një dëmtimi të rëndë. Një mënyrë për ta zbutur situatën në një klimë feste dhe euforie pas asaj arritjeje. Dhe kështu, që nga ai moment, “Silla de Alaba” u bë një festim ikonik për lojtarët e Real Madrid, që nxirret në pah në rastet e mëdha. Te Udinese mezi presin ta shohin sërish një të tillë të valëvitet drejt qiellit.
