Vlora Hyseni shantazhoi gazetaren/ Këlliçi: E papranueshme, t’i shtohet akuzë e re

Deputeti dhe nënkryetari i PD-së, Belind Këlliçi, ka reaguar pas deklaratës shantazhuese të ish-drejtueses së SHISH-it, Vlora Hyseni, ndaj gazetares Klodiana Lala, pak para mbërritjes në GJKKO.

Këlliçi shkruan në “Facebook” se rasti është i papranueshëm, ndërsa thekson se ndaj Hysenit duhet të shtohet një akuzë e re për kanosjen e një përfaqësueseje të medias.

Reagimi i plotë:

Dënoj me forcë kërcenimin e Vlora Hysenit ndaj gazetares kurajoze dhe profesioniste Klodiana Lala. Zonja nën akuzë për krime të renda, zonja që trafikon sekretet shtetërore, kjo anëtare e nje Grupi të Strukturuar Kriminal, ka guximin të shantazhojë një gazetare që ka denoncuar krimin dhe bandat, që Vlora Hyseni i ka mbrojtur dhe ju ka shërbyer.

SPAK duhet urgjentisht t"i komunikojë asaj një akuzë të re, atë të kanosjes ndaj një përfaqësuese të medias. Kjo eshtë e papranueshme!

Në vend se të ulë koken për turpet që ka bërë, ngre krye dhe bën presion. Ky është në fakt stili dhe fytyra e qeverisjes së Edi Ramës.

Doja ta ngrija në Parlament këtë incident të rëndë, por urdhrat e Ramës për të heshtur Opozitën e bëjnë të pamundur. /CNA