BERZH rrit parashikimin: Ekonomia shqiptare do rritet 3.5% në 2026-ën

Ekonomia shqiptare pritet të rritet me 3.5% gjatë vitit 2026, sipas parashikimit më të fundit të Bankës Evropiane për Rindërtim dhe Zhvillim. Shifra është rishikuar me 0.1 pikë përqindjeje në rritje krahasuar me parashikimin e qershorit.

BERZH vlerëson se ekonomia ka ruajtur ritme të larta edhe gjatë pjesës së parë të vitit. Në gjashtëmujorin e parë, rritja ekonomike është vlerësuar në 3.7% me bazë vjetore, ndërsa për vitin 2027 parashikimi mbetet në 3.5%.

Shqipëria renditet ndër ekonomitë me rritjen më të lartë në Ballkanin Perëndimor, ku mesatarja për vitin 2026 parashikohet në 3%. Në rajon, Kosova pritet të rritet me 3.5%, Maqedonia e Veriut me 3.3%, ndërsa Mali i Zi dhe Serbia me 3.1%.

Por perspektiva globale mbetet më e vështirë. BERZH ka ulur në 2.5% parashikimin e rritjes për ekonomitë ku operon, mes ndikimit të kushteve më të shtrënguara financiare, problemeve në tregti dhe rritjes së çmimeve të energjisë.

Në këtë klimë, banka vlerëson se kërkesa e jashtme, investimet dhe turizmi do të vijojnë të mbështesin ekonominë shqiptare.