Zbulohet vila e torturave në Spanjë, arrestohen 7 anëtarë të një grupi kr'iminal serb

Policia Kombëtare e Spanjës ka goditur një grup të krimit të organizuar nga Serbia që vepronte përgjatë Costa del Sol, Campo de Gibraltar dhe rajonit të Levantes, raporton El Español. Operacioni çoi në zbulimin e një «dhome torture» në një vilë luksoze të marrë me qira në Estepona, ku policia shpëtoi gjatë natës dy burra.

Ndërhyrja e policisë

Ngjarja nisi natën e së shtunës, më 5 shtator, rreth orës 01:05, kur shërbimi i emergjencës 091 mori një telefonatë shqetësuese. E dashura e njërit prej burrave të rrëmbyer njoftoi se partneri i saj kishte shkuar në adresën Nueva Atalaya 65 për «punë të dyshimta» dhe i kishte kërkuar të telefononte policinë nëse nuk i përgjigjej brenda dhjetë minutash.

Patrulla e parë që mbërriti në vendngjarje vuri re një dritë të ndezur në vilë dhe i ra ziles. Kur u hap porta automatike, nga ndërtesa dolën dy burra të maskuar, me kapuça në kokë dhe doreza mbrojtëse. Menjëherë pas tyre, nga dera e kuzhinës doli me vrap një burrë krejtësisht i zhveshur, i rrahur dhe i gjakosur. Në gjendje paniku, ai bërtiste: «Më kanë rrëmbyer dhe duan të më vrasin!»

Njëri prej të dyshuarve të maskuar, i identifikuar më vonë si Marko N. (i lindur në vitin 1995), kapërceu murin e oborrit duke mbajtur në dorë diçka që dukej si armë zjarri. Pasi një polic qëlloi në ajër për paralajmërim, i dyshuari u ndalua në trotuar me ndihmën e forcave të tjera. Pak më vonë u arrestua edhe burri tjetër i maskuar, Filip J. (i lindur në vitin 2001).

"Vila e tmerrit"

Policia vuri në gatishmëri të gjitha njësitë e disponueshme nga Estepona dhe Marbella. Anëtarët e grupit nisën të largoheshin nga vila në drejtime të ndryshme. Zoran N. (i lindur në vitin 1991) u kap teksa po kapërcente një pengesë, ndërsa Leon Y. (i lindur në vitin 1997) u gjet i fshehur në shkurret e oborrit fqinj.

Gjatë largimit, njëri prej të dyshuarve hodhi një çantë sportive në pronën ngjitur. Brenda saj, policia gjeti pushkë automatike AK-47, të njohura si «Kallashnikov», të cilat sipas raportimit përdoreshin për të ruajtur bazën e grupit. Në brendësi të vilës u gjet edhe viktima e dytë, Miguel Ángel, i cili ishte i gjakosur dhe kërkonte ndihmë.

Gjatë kontrollit të shtëpisë, hetuesit gjetën një dhomë të mbuluar plotësisht me fletë plastike. Aty ndodheshin një karrige, lidhëse plastike, një çekiç, pinca, shirit ngjitës, një pistoletë me silenciator dhe armë të tjera zjarri të shpërndara në dysheme.

Ekspertët e balistikës po analizojnë armët e sekuestruara për të përcaktuar nëse janë përdorur më parë në përplasje të armatosura apo vepra të tjera penale në zonën e Marbellas.

Dyshimet për një përplasje brenda grupit

Burime nga hetimi thonë se dy burrat e keqtrajtuar, Miguel Ángel, i lindur në Cádiz në vitin 1981, dhe Hamza, i lindur në Ceuta në vitin 1995, kanë gjithashtu precedentë të shumtë penalë. Sipas dyshimeve të hetuesve, të dy ishin pjesëtarë të të njëjtit grup kriminal dhe u torturuan në shenjë hakmarrjeje për dështimin e një detyre të mëparshme, që mund të lidhej me «humbjen e ngarkesës» ose me një borxh. Njëri prej tyre u dërgua në burg menjëherë pasi doli nga spitali.

Për arsye sigurie dhe për shkak se hetimi vijon, policia po shqyrton mundësinë që dy burrave t’u jepet statusi i dëshmitarëve të mbrojtur.

Në total janë arrestuar shtatë shtetas serbë. Asnjëri prej tyre nuk ka vendbanim të regjistruar në Spanjë. Sipas raportimit, kjo ngre dyshime se ata kanë hyrë ilegalisht në vend për të shmangur regjistrimin. Gjatë arrestimeve dhe ndjekjes përtej gardheve u plagosën tre punonjës policie.

Gjatë këqyrjes mjekoligjore të vilës u gjetën edhe gjurmë biologjike të personave të tjerë të lidhur me botën e krimit serb. Hetimi mbetet i hapur. Shtatë të arrestuarit janë dërguar në burgun Alhaurín de la Torre, ku, sipas raportimit, kanë kërcënuar personelin duke kërkuar të vendosen në të njëjtin sektor dhe në të njëjtat qeli.