Vlora Hyseni sulmon Klodiana Lalën para GJKKO-së, gazetarja: Shantazh. AGSH: Të tërheqë deklaratat (REAGIMET)

Klodiana Lala

TIRANË- Gazetarja Klodiana Lala, ka reaguar për sulmin verbal të bërë ndaj saj nga ish-shefja e Shërbimit Sekret Informativ, Vlora Hyseni, e cila pasi u pyet nëse ka shpërndarë apo jo sekrete shtetërore siç edhe dyshon Prokuroria e Posaçme, akuzoi reporteren për takime me agjentë serbë. Gazetarja Lala e quan deklaratën e Hysenit një sulm personal dhe shantazh, si hakmarrje e informimit të publikut me detaje për akuzat që rëndojnë mbi ish-shefen e SHISH dhe veprimtarinë kriminale në të cilën dyshohet se ajo është përfshirë.

“E pyetur nga News24 nëse ka shpërndarë materiale të klasifikuara në drejtim të shtetasit Ergys Agasi, deputetja ka zgjedhur të kundërsulmojnë me gjuhë vulgare ndaj gazëtareve dhe duke i shantazhuar ata për takime në hotele të ndryshme. Kjo ka qenë përgjigjja e zonjës Hyseni, por asnjë fjalë për materialet që ka shpërndarë dhe që dyshohet sipas Prokurorisë së Posaçme që ka shpërndarë në adresë të shtetasit Ergys Agasi”, tha Lala./Dosja.al

Klodiana Lala

TIRANË- Asociacioni i Gazetarëve të Shqipërisë (AGSH) ka dënuar sulmin e ish kreut të Shërbimit Infomativ të Shtetit (SHISH), Vlora Hyseni ndaj gazetares Klodiana Lala, teksa po hynte në ambientet e GJKKO në lidhje me hetimin ndaj saj se i ka dhënë informacione sekrete Ergys Agasit.

Teksa gazetarja Klodiana Lala i drejtohet ish kryetares së SHISH nëse i ka dhënë informacione biznesmenit të akuzuar nga SPAK si kreu i grupit kriminal që vepronte te AKSHI, Hyseni e shantazhoi.

Asociacioni kërkoi që Hyseni të tërheqë menjëherë deklaratat ndaj gazetares Lala, ndërsa i kërkon SPAK që ta shohë me seriozitet “këtë episod shantazhi nga ana e Hysenit ndaj një gazetareje.”

“Asociacioni i Gazetarëve të Shqipërisë dënon me termat më të ashpër shantazhin dhe sulmet e të dyshuarës së SPAK, ish-shefes së SHISH Vlora Hyseni ndaj gazetares Klodiana Lala. Çdo i dyshuar i drejtësisë duhet të janë llogari vetëm përpara drejtësisë ndërsa shantazhet ndaj gazetarëve nuk mund të tolerohen. AGSH i bën thirrje Zonjës Hyseni  që të tërheqë menjëherë deklaratat e saj ndërsa e nxisim Strukturën e Posaçme që të shikojë me seriozitet këtë episod shantazhi nga ana e saj ndaj një gazetareje,”, shkruan AGSH./Dosja.al

 Vlora Hyseni

TIRANË- Ish-shefja e Shërbimit Informativ Shtetëror, Vlora Hyseni, gjatë mbërritjes në GJKKO iu drejtua gazetares Klodiana Lala me një akuzë lidhur me pretendime për kontakte me agjentë serbë.

“Klodi, si po kalon me ata agjentët serbë në dhomat e Rognerit?”, i tha Hyseni gazetares, në një përplasje verbale përpara kamerave.

Hyseni u paraqit në ambientet e Gjykatës së Posaçme për tu njohur me masën e sigurisë të kërkuar ndaj saj. Hyseni është paraqitur në gjykatë nën shoqërimin e forcave të sigurisë, ndërsa nuk ka dhënë përgjigje për pyetjet e gazetarëve të pranishëm.

Hyseni akuzohet për “nxjerrje të sekretit shtetëror” dhe “përkrahje të autorit të krimit”. Katër ditë para se ti komunikohej masa e sigurisë "arrest në shtëpi", Hyseni ishte pyetur në Prokurorinë e Posaçme si person në dijeni për lidhjet me Ergys Agasin, biznesmenin e arrestuar më 26 gusht për aferën e AKSHI-t.

Ajo kishte pranuar kontaktet me Agasin, duke thënë se qëllimi ka qenë për shkak të detyrës së saj, por mesazhet tregojnë të kundërtën që thotë ish-kreu i SHISH. Por, gjatë kontrolleve të 22 korrikut në “Equos Resort”, SPAK kishte gjetur 9 faqe dokumente të dyshuara të dhëna sekrete shtetërore dhe qindra komunikime të Hysenit me Agasin. Gjatë një seanca edhe vetë Agasi kishte pranuar se i kishte lënë dokumentat në makinëme qëllim që t'i gjente SPAK.

Nga komunikimet e zbuluara në celular të Agasit dhe Vlora Hysenit, nga fundi i qershorit deri më 26 gusht kur ai u arrestua në Durrës, tregojnë një lidhje shumë më të afërt, ndryshe nga ata që thonë "bashkëpunëtor”./Dosja.al