Një ngarkesë me açuge të eksportuara nga Shqipëria drejt Italisë është tërhequr nga tregu pasi kontrollet e autoriteteve italiane kanë evidentuar nivele të larta histamine, një substancë që, në përqendrime të tejkaluara, mund të shkaktojë probleme shëndetësore.
Njoftimi është publikuar më 22 shtator në sistemin RASFF të Komisionit Evropian, pas kontrolleve të kryera nga autoritetet italiane në treg dhe marrjes së mostrave rutinë.
Sipas të dhënave të bëra publike, në produkt është konstatuar prani e histaminës në nivelin 800 mg/kg (ppm), ndërsa kufiri maksimal i lejuar është 400 mg/kg (ppm).
Autoritetet italiane kanë urdhëruar tërheqjen e produktit nga tregu dhe kanë njoftuar sistemin RASFF për rastin.
Sipas burimeve të cituara nga Qendra ALERT pranë Ministrisë së Bujqësisë, produkti ishte importuar fillimisht në Shqipëri, ku më pas ishte përpunuar për t’u rieksportuar drejt Italisë. Sipas të njëjtave burime, kompania shqiptare që ka kryer përpunimin dhe eksportin është “Poseidon” sh.p.k.
Çfarë është histamina?
Histamina mund të krijohet te peshqit gjatë procesit të shpërbërjes bakteriale të aminoacidit histidinë. Procesi përshpejtohet kur produkti nuk ruhet në kushtet dhe temperaturat e përshtatshme të ftohjes.
Një veçori e rëndësishme e histaminës është se ajo është rezistente ndaj nxehtësisë. Kjo do të thotë se, pasi është formuar, gatimi, skuqja apo përpunimi termik nuk e eliminojnë atë.
Konsumimi i peshkut me nivele të larta histamine mund të shkaktojë helmim ushqimor të njohur si intoksikim histaminik, simptomat e të cilit mund të ngjajnë me një reaksion alergjik.
Shenjat mund të shfaqen nga disa minuta deri në disa orë pas konsumimit dhe mund të përfshijnë:
- skuqje të fytyrës dhe qafës, shoqëruar me ndjesi nxehtësie;
- kruajtje të lëkurës ose shfaqje të njollave dhe puçrrave të kuqe;
- dhimbje koke dhe marramendje;
- dhimbje stomaku, të përziera, të vjella ose diarre;
- rritje të rrahjeve të zemrës (takikardi).
Rasti është referuar tashmë në sistemin evropian të alarmit për ushqimin dhe ushqimin për kafshë, ndërsa produkti është urdhëruar të hiqet nga tregu italian.