GJKKO lë në fuqi arrestin në shtëpi për ish-drejtuesen e SHISH, Vlora Hyseni, njoftimi zyrtar

Gjykata e Posaçme e Shkallës së Parë për Korrupsionin dhe Krimin e Organizuar ka vendosur të vijojë masën e sigurisë “Arrest në shtëpi” ndaj ish-drejtueses së Shërbimit Informativ të Shtetit, Vlora Hyseni.

Vendimi u mor këtë të enjte, më 24 shtator, nga gjyqtarja Flojera Davidhi, pas kërkesës së Prokurorisë së Posaçme kundër Korrupsionit dhe Krimit të Organizuar, e cila ishte depozituar në gjykatë një ditë më parë.

Sipas njoftimit zyrtar të GJKKO-së, SPAK kishte kërkuar marrjen në pyetje të Hysenit, e cila ndodhet nën hetim dhe ndaj së cilës ishte caktuar më herët masa e sigurimit “Arrest në shtëpi”.

Në përfundim të seancës, gjykata vendosi me vendimin nr. 69, datë 24.09.2026, vazhdimin e zbatimit të kësaj mase, të parashikuar nga neni 237 i Kodit të Procedurës Penale.

Gjykata ka vendosur gjithashtu që vendimi të mos bëhet publik, tërësisht ose pjesërisht, deri në përfundimin e hetimeve paraprake, në zbatim të nenit 103 të Kodit të Procedurës Penale.

Seanca u zhvillua me dyer të mbyllura dhe zgjati rreth dy orë e njëzet minuta. Pas përfundimit të saj, Vlora Hyseni u largua nga ambientet e GJKKO-së pa dhënë deklarata për mediat.

E pyetur nga gazetarët lidhur me përgjimet e SPAK, Hyseni nuk pranoi të përgjigjej.

Deri në këtë fazë, njoftimi zyrtar i gjykatës nuk jep detaje mbi përmbajtjen e hetimit, provat apo arsyet konkrete që kanë çuar në vijimin e masës së “arrestit në shtëpi”.

Njoftimi i GJKKO:

1. Kërkuesi Prokuroria e Posaçme kundër Korrupsionit dhe Krimit të Organizuar, më datë 23.09.2026 ka paraqitur pranë gjykatës kërkesën për marrjen në pyetje të personit nën hetim Vlora Hyseni, ndaj së cilës është caktuar masa e sigurimit “Arrest në shtëpi”.
2. Në përfundim të gjykimit, Gjykata e Posaçme e Shkallës së Parë për Korrupsionin dhe Krimin e Organizuar me trup gjykues të përbërë nga gjyqtarja Flojera Davidhi, me vendimin nr. 69, datë 24.09.2026 vendosi vazhdimin e zbatimit të masës së sigurimit personal me karakter shtrëngues “Arrest në shtëpi”, parashikuar nga neni 237 i K.Pr.Penale, ndaj personit nën hetim Vlora Hyseni.
3. Gjithashtu, gjykata, bazuar në nenin 103 të K.Pr.Penale ka vendosur ndalimin e publikimit tërësisht apo pjesërisht të këtij vendimi gjyqësor deri në përfundim të hetimeve paraprake.

Tiranë, më datë 24.09.2026

Gjykata e Posaçme e Shkallës së Parë për Korrupsionin dhe Krimin e Organizuar.