Franca: Urdhër-arresti i GJND-së nuk përbën pengesë për fluturimin e Netanyahut mbi hapësirën tonë ajrore

Franca mbrojti vendimin e saj për të lejuar aeroplanin e kryeministrit izraelit, Benjamin Netanyahu të kalonte hapësirën e saj ajrore gjatë rrugës për në Kombet e Bashkuara. Franca u shpreh se ligji ndërkombëtar nuk kërkon veprim pavarësisht një urdhër-arresti të Gjykatës Ndërkombëtare Penale kundër tij për krime të dyshuara lufte.

Franca është nënshkruese e Statutit themelues të Romës të GJPN-së dhe është zyrtarisht e detyruar të bashkëpunojë me gjykatën, duke përfshirë arrestimin e të dyshuarve që hyjnë në territorin e saj. Zëdhënësi i Ministrisë së Jashtme Pascal Confavreux u tha gazetarëve se leja ishte “në përputhje të plotë me ligjin ndërkombëtar”.

“Statuti i Romës nuk vendos asnjë detyrim në lidhje me fluturimet mbi territorin e saj nga një aeroplan shtetëror që ka një pasagjer i cili është në shënjestër të një urdhër-arresti”, tha Confavreux.

Netanyahu nuk është në gjendje të udhëtojë në shumë vende për shkak të një urdhër-arresti nga Gjykata Ndërkombëtare Penale e lëshuar kundër tij dhe ministrit të tij të atëhershëm të mbrojtjes, si dhe komandantit të atëhershëm ushtarak të Hamasit në vitin 2024.

Izraeli e kundërshton juridiksionin e gjykatës me seli në Hagë dhe mohon krimet e luftës në Gaza, ku zhvilloi një fushatë ushtarake që thotë se kishte për qëllim eliminimin e Hamasit pas sulmit vdekjeprurës ndaj Izraelit nga grupi militant palestinez më 7 tetor 2023. Izraeli po i konteston urdhër-arrestet kundër Netanyahut dhe ish-shefit të tij të mbrojtjes, Yoav Gallant.

Aplikacioni i gjurmimit të fluturimeve Flightradar24 tregoi se avioni i Netanyahut fluturoi mbi Greqi, Itali dhe Francë.  Vitin e kaluar Netanyahu fluturoi në një itinerar rrethor për në Nju Jork duke anashkaluar hapësirën ajrore të disa vendeve evropiane, përfshirë Francën, raportuan mediat në atë kohë.