Një banesë është grabitur gjatë natës në fshatin Shelegar të bashkisë Sarandë, ndërsa autorët dyshohet se kanë përfituar nga mungesa e familjarëve, të cilët ndodheshin në një dasmë.

Ngjarja ka ndodhur gjatë natës të së martës, në banesën e familjes së Mejdi Tushes. Në momentin e vjedhjes, në shtëpi nuk ndodhej asnjë prej familjarëve, pasi ata kishin shkuar në dasmën e një të afërmi.

Vjedhja është konstatuar pasi një prej familjarëve është kthyer në banesë dhe ka gjetur gjithçka të rrëmujshme. Menjëherë ai ka kuptuar se persona të paidentifikuar kishin hyrë në shtëpi dhe ka njoftuar Policinë.

Sipas burimeve nga familjarët, autorët kanë marrë rreth 15 milionë lekë të vjetra, si dhe disa bizhuteri.

Në banesë kishte edhe kamera sigurie, por autorët dyshohet se kanë ndërhyrë fillimisht në sistemin e kamerave, duke e dëmtuar atë për të shmangur identifikimin e tyre.

Grupi hetimor ka mbërritur në vendngjarje dhe po punon për identifikimin dhe kapjen e autorëve, si dhe për zbardhjen e plotë të rrethanave të vjedhjes. Sipas të dhënave paraprake, dyshohet se në grabitje kanë marrë pjesë dy persona, të cilët duket se kanë shfrytëzuar momentin kur familja Tusha ndodhej në dasmë për të kryer vjedhjen.