Presidenti Bajram Begaj pritet të mbledhë Këshillin e Sigurimit Kombëtar në fillim të javës së ardhshme, në një zhvillim që vjen pas masës së sigurisë ndaj ish-drejtoreshës së SHISH, Vlora Hyseni.

Burime nga Presidenca bëjnë me dije se mbledhja pritet të zhvillohet në ditët e para të javës së ardhshme. Lajmi është raportuar edhe nga media të ndryshme, të cilat i referohen burimeve pranë Presidencës.

Hyseni u vendos në masën e sigurisë “arrest në shtëpi” pas kërkesës së SPAK, ndërsa GJKKO vendosi më 24 shtator vazhdimin e kësaj mase. Sipas gjykatës, ndaj saj vijon hetimi për veprat penale të parashikuara nga nenet 320/2 dhe 295/a/1 të Kodit Penal.

Një ditë më herët, Presidenti Begaj zhvilloi në Presidencë një takim me ministrin e Brendshëm, Ervin Demo, drejtorin e Përgjithshëm të Policisë së Shtetit, Skënder Hita, dhe drejtorin e komanduar të SHISH, Elvis Lila. Takimi u zhvillua në kuadër të zhvillimeve të fundit që lidhen me sigurinë kombëtare.

Ndërkohë, kryeministri Edi Rama ndodhet jashtë vendit për angazhimet e tij në kuadër të Asamblesë së Përgjithshme të Kombeve të Bashkuara dhe pritet të rikthehet në Shqipëri më 26 shtator.

Mbledhja e Këshillit të Sigurimit Kombëtar, nëse konfirmohet, pritet të zhvillohet pas rikthimit të kryeministrit në vend dhe në një moment kur çështja e hetimit ndaj ish-drejtoreshës së SHISH ka ngritur diskutime lidhur me sigurinë kombëtare dhe funksionimin e institucioneve të sigurisë.