Rikthimi i Turqisë në programin F-35/ Erdogan: Trump është pozitiv për këtë perspektivë

Presidenti i Turqisë, Recep Tayyip Erdogan, ka deklaruar se beson se Turqia do të rikthehet në programin amerikan të avionëve luftarakë F-35, duke theksuar se Ankaraja tashmë pret “hapa konkretë” nga Uashingtoni.

Duke folur për gazetarët gjatë kthimit nga Nju Jorku, ku mori pjesë në punimet e Asamblesë së Përgjithshme të Kombeve të Bashkuara, Erdogan tha se presidenti amerikan Donald Trump kishte shprehur një qëndrim pozitiv lidhur me rikthimin e Turqisë në programin F-35.

“Presidenti Trump shprehu vullnet pozitiv lidhur me rikthimin e Turqisë në programin F-35”, deklaroi Erdogan, sipas mediave turke.

Presidenti turk shtoi se Ankaraja pret tashmë hapa konkretë nga pala amerikane, të cilët do të mundësonin rifillimin e bashkëpunimit në fushën e avionëve luftarakë të avancuar.

Turqia u përjashtua nga programi F-35 në vitin 2019, pasi vendosi të blejë sistemin rus të mbrojtjes ajrore S-400. Vendimi shkaktoi reagime të forta nga Shtetet e Bashkuara, të cilat e konsideruan përdorimin e S-400 të papajtueshëm me pjesëmarrjen e Turqisë në programin F-35.

Çështja e F-35 mbetet një nga temat kryesore në marrëdhëniet mes Ankarasë dhe Uashingtonit. Turqia synon të forcojë kapacitetet e saj ajrore përmes avionëve luftarakë të gjeneratës së pestë.

Deklaratat e Erdo?an vijnë pas takimit të tij me Donald Trump në Nju Jork, në kuadër të Asamblesë së Përgjithshme të OKB-së. Sipas palës turke, gjatë takimit u diskutuan marrëdhëniet dypalëshe, bashkëpunimi në fushën e mbrojtjes dhe çështjet e sigurisë rajonale.

Tashmë pritet të shihet nëse “vullneti pozitiv” i përmendur nga Erdogan do të pasohet nga vendime zyrtare të administratës amerikane për rikthimin e Turqisë në programin F-35. /CNA