Dyshohet për krime në kampin nazist të të burgosurve të luftës/ Nisin hetimet ndaj 105-vjeçarit në Gjermani

Prokuroria gjermane po heton një burrë 105-vjeçar, i cili dyshohet se ka qenë bashkëpunëtor në disa raste vrasjesh gjatë kohës që shërbente si roje në një kamp nazist të robërve të luftës gjatë Luftës së Dytë Botërore.

105-vjeçari dyshohet se ka shërbyer si roje në kampin Stalag 326 VI K, në Senne, në veriperëndim të Gjermanisë. Sipas prokurores së Dortmundit, Sonja Frodermann, hetimi është ende në zhvillim. Një tjetër çështje e ngjashme ishte hapur ndaj një ish-roje të kampit në Senne, por ai ka vdekur disa muaj më parë, në moshën 99-vjeçare.

Autoritetet gjermane nuk kanë bërë publike detaje të tjera për identitetin e dy ish-rojeve. Rastet tregojnë vështirësitë me të cilat përballen prokurorët gjermanë në përpjekjet për të hetuar dhe ndjekur penalisht krimet naziste, më shumë se 80 vjet pas përfundimit të luftës.

Më shumë se 5.3 milionë ushtarë të Ushtrisë së Kuqe sovjetike u mbajtën robër nga Gjermania naziste gjatë Luftës së Dytë Botërore dhe besohet se rreth gjysma e tyre humbën jetën. Kampi i Senne ishte një nga kampet më të mëdha të robërve të luftës. Sipas memorialit të kampit, rreth një në tre robër sovjetikë që hynë në robëri në Gjermaninë naziste gjatë viteve 1941–1945 kaluan përmes Senne-s, ndërsa shumë prej tyre u dërguan më pas në punë të detyruar në rajon.

Kushtet e jetesës në kamp ishin jashtëzakonisht të këqija. Të burgosurit përballeshin me keqtrajtime, uri dhe kequshqyerje. Rreth 180,000 deri në 200,000 robër sovjetikë u regjistruan në kamp dhe shumë prej tyre vdiqën. Dhjetëra mijëra prej tyre janë varrosur në zonën përreth.

Në kamp u mbajtën gjithashtu robër nga Franca, Polonia, Serbia dhe Belgjika. Në momentin e çlirimit të kampit në vitin 1945, aty ndodheshin ende më shumë se 9,000 robër sovjetikë. Prokurorët kanë bërë të qartë se hetimi ndaj 105-vjeçarit vazhdon dhe se akuzat lidhen me dyshimet për bashkëpunim në disa vrasje gjatë kohës së tij në Stalag 326. /CNA