CNN, Politico dhe MS NOW janë rikthyer në Shtëpinë e Bardhë, disa orë pasi një gjykatës federal vendosi se ndalimi i vendosur ndaj këtyre tri mediave nga presidenti Donald Trump ishte me gjasë antikushtetues dhe urdhëroi rikthimin e menjëhershëm të aksesit të tyre.
Mediat kishin kërkuar një seancë urgjente gjyqësore për të rifituar hyrjen në Shtëpinë e Bardhë, duke akuzuar administratën, përmes një dokumenti gjyqësor, se kishte “shkelur në mënyrë të përsëritur” vendimin e gjykatësit për heqjen e ndalimit. Në atë moment nuk ishte e qartë nëse seanca do të zhvillohej.
Shtëpia e Bardhë deklaroi se kishte nisur rikthimin e aksesit pak pas orës 09:00, sipas orës lokale lindore të SHBA-ve, të enjten, megjithëse CNN e ka kundërshtuar këtë kronologji.
Fillimisht, Trump tha se vendimi për t’i ndaluar këto media ishte marrë për shkak të raportimeve që ai i cilësonte si “lajme të rreme” (“fake news”). Më vonë, Shtëpia e Bardhë përmendi sigurinë kombëtare si një nga arsyet e ndalimit.
Përplasja mes administratës dhe mediave ndikoi në një pjesë të mbulimit televiziv në një ditë kur Trump priste presidentin kinez Xi Jinping në Shtëpinë e Bardhë, në prag të një darke zyrtare të planifikuar më vonë.
Në orët e para të së enjtes, gjykatësi federal Timothy Kelly vendosi se ndalimi ndaj mediave duhej të hiqej përkohësisht, duke argumentuar se ai “me gjasë shkelte të drejtat e tyre kushtetuese për një proces të rregullt ligjor”.
CNN, Politico dhe MS NOW raportuan se u ishte mohuar hyrja në Shtëpinë e Bardhë gjatë mëngjesit, çka i shtyu të kërkonin ndërhyrje urgjente nga gjykata.
Në përgjigje të kërkesës, drejtori i Operacioneve të Shtëpisë së Bardhë deklaroi në një dokument gjyqësor se lejet e shtypit dhe kartat e konfiskuara ishin rikthyer deri në orën 09:45.
Pak më vonë, të tria mediat konfirmuan se u ishte lejuar sërish hyrja në Shtëpinë e Bardhë.
Ndërkohë, rrjete të tjera televizive, përfshirë Fox News, NBC, CBS dhe ABC, të cilat ishin larguar nga Shtëpia e Bardhë në shenjë solidariteti me mediat e përjashtuara, ende nuk kanë konfirmuar nëse do të rifillojnë mbulimin e drejtpërdrejtë nga ambientet e Shtëpisë së Bardhë.