Një 28-vjeçar me origjinë shqiptare është vënë nën hetim në ishullin e Rodosit, në Greqi, pas kallëzimit të një 44-vjeçareje me origjinë polake, e cila e akuzon për mashtrim financiar dhe kërcënim me publikimin e fotove intime.
Sipas mediave greke, rasti është marrë në hetim nga Nëndrejtoria e Hetimit dhe Ndjekjes Penale të Krimit në Rodos, pas denoncimit të bërë nga 44-vjeçarja.
Në dëshminë e saj, gruaja pretendon se 28-vjeçari e ka bindur përmes informacioneve dhe fakteve të rreme që t’i transferonte shuma të ndryshme parash në disa këste.
Transfertat dyshohet se janë kryer gjatë periudhës nga tetori i vitit 2024 deri në nëntor 2025. Sipas kallëzimit, në total 44-vjeçarja i ka dhënë të riut shumën prej 15,417 eurosh.
Gruaja ka deklaruar para autoriteteve se më vonë ka kuptuar se informacionet dhe të dhënat mbi të cilat ishte bazuar për t’i dhënë paratë nuk përputheshin me realitetin. Për këtë arsye, ajo i ka kërkuar 28-vjeçarit që t’i kthente shumën e parave.
Por, sipas kallëzimit, në këtë moment situata është përshkallëzuar.
28-vjeçari dyshohet se e ka kërcënuar 44-vjeçaren duke i thënë se do t’u dërgonte të afërmve të saj fotografi nudo të saj, të cilat pretendohet se i kishte në posedim.
E frikësuar nga kërcënimet dhe nga mundësia që materialet intime të shpërndaheshin te familjarët e saj, gruaja iu drejtua policisë së Rodosit dhe bëri kallëzim ndaj 28-vjeçarit.
Pas denoncimit, autoritetet greke kanë nisur procedurat penale ndaj të riut për mashtrim, kërcënim dhe pornografi për hakmarrje, ndërsa çështja vijon të hetohet nga autoritetet kompetente.
Hetimet pritet të hedhin dritë mbi mënyrën se si janë marrë paratë, pretendimet e 44-vjeçares dhe nëse 28-vjeçari ka pasur apo jo në posedim materialet intime me të cilat dyshohet se e ka kërcënuar.
Deri në përfundimin e hetimeve dhe një vendim përfundimtar të gjykatës, akuzat ndaj 28-vjeçarit mbeten pretendime të ngritura në kuadër të kallëzimit të bërë nga 44-vjeçarja.
